Morgan : فيلم رعب ممتزج بالخيال العلمي

بنحب فكرة إمتزاج عنصرين لصنع عنصر ثالث… فى فيلم اليوم بيجتمع عنصر الخيال العلمي مع عنصر الرعب علشان يقدموا لنا ساعة ونصف –تقريبا- من الخيال والمتعة والرعب… لكن الحقيقة النتيجة النهائية مكانتش فى قوة  وجمال اللى كنا معتقدينه فى البداية. لكن يظل الفيلم صالح للمشاهدة مع مشروب ساخن فى أجازة الويك إند.

من إخراج لوك سكوت وبطولة كيت مارا و انيا تيلور جوي و روز ليزلي بنشوف قصة عن (كيان) بيقع فى المنطقة الفاصلة بين الإنسان والروبوت… الشخص ده تم تصنيعه من خلال طفرة فى الحمض النووي.. الأمور كلها بتبدو مبشرة بالخير فى البداية… بداية من سرعة النمو وسرعة التعلم والذاكرة وكل شىء تاني، وبيبدو إن العلم توصل لكشف عبقري وحقيقي… لكن الأمور بتنقلب رأساً على عقب لما مورجان –وده إسم الشخصية- بتشعر بالغضب وبتفلت أعصابها وبتبدأ فى إرتكاب جرائم.. هنا بيتم إستدعاء أحد الخبراء للحكم على التجربة ومعرفة هل ينفع تستمر أم لا.

الربع الأول من الفيلم بينتصر لجانب الخيال العلمي فى الأحداث، وبنشوف معلومات أكتر عن طرق تخليق الأجنة والتلاعب بالأحماض النووية وغيرها من المصطلحات اللى ممكن  تكون معقدة أو مش مجال إهتمام المشاهدين المهتمين بالرعب وبس، لكن باقى أحداث الفيلم بتنتصر تماماً للنوعية دي من المشاهدين وبتقدم لهم جرعة الرعب المطلوبة، لكن ما نقدرش ننكر إن شوية ملل تسربوا لنفسنا فى بداية أحداث الفيلم.

الأداء التمثيلي للأبطال كان متميز ونخص بالذكر طبعا انيا تيلور و كيت مارا اللى قدروا يوصلوا من خلال ملامح وجههم الجامدة كتير جدا من أحداث الفيلم، وقدروا ينقلوا تركيزنا لطريقة كل منهم فى الحركة والكلام والتفاعل، ودي أهم حاجه بنقيم علي أساسها نجاح الفنان من عدمه.

على الرغم من وجود بعض المشاكل فى السيناريو لكن مانقدرش نقول إن سيناريو الأحداث كان فاشل بالكامل، فقط كان محتاج بعض الحركة خاصة فى الجزء الأول من الفيلم على الرغم من قوة المشهد الإفتتاحي للأحداث. أما الحوار فكان ممل فى جانب كبير منه وحسينا إن وجود الحوار ماخدمش القصة إطلاقاً بل على العكس أضعف الأحداث على الشاشة فى بعض المشاهد.. لكن مانقدرش ننكر بعض المشاهد اللى كان فيها تميز حواري لكنها كانت قليلة.

الديكورات والموسيقي التصويرية كانوا من أهم عوامل قوة الفيلم، والديكورات قدرت تخلق عالم كامل للمنطقة اللى بتدور فيها أحداث الفيلم واللى المفروض إنها منطقة سرية ومافيش حد يعرف عنها حاجه، كمان الموسيقي ساعدت على خلق جو من الترقب فى الأحداث وقدرت تنقلنا سمعياً لمساحة أحداث الفيلم وتكاملت مع الديكورات علشان تقدم لنا قصة متميزة بتجمع بين الخيال العلمي والرعب زي ما قولنا قبل كده.

Morgan مش فيلم خيال علمي من أ الى ي ، ومش فيلم رعب من أ الى ي.. لكنه مزيج من الإتنين يستحق المشاهدة وهايعجب مساحة عريضه من الجمهور بشرط إننا ما نحطش له أمال عريضة أزيد من الازم.