Mortdecai : فيلم ممل وعديم الهدف
بعض الافلام بنحس ان منتجيها بيكتفوا بوضع اسم ضخم زي (جوني ديب) على الغلاف، ويتركوا السنارة تصطاد المشاهدين بدون الاهتمام باى تفاصيل اخرى خاصة بالفيلم، ده باختصار راينا عن Mortdecai الفيلم اللى اكتفى صانعيه باسم البطل، وتركونا لفيلم مكرر وغير هادف وخرجنا منه كما دخلناه… أو اسوأ.
من تأليف اريك اورنسون واخراج ديفيد كويب وبطولة جوني ديب و جونيث بالترو واوليفيا مان و ايوان ماكريجور بنشوف قصة صائد وبائع تحف مفلس هو السيد (موردخاي) الواقع فى الديون، واللى بيسعي لعقد صفقة اخيرة مليئة بالتعقيدات، والخاصة بلوحة اثرية بتحتوي على ارقام حساب فى احد بنوك سويسرا، مُخرن فيه كمية ضخمة من الذهب المُهرب من ايام الحرب العالمية الثانية، الامر اللى بيقود لمجموعة من المواقف (المفروض) انها كوميدية. لكن ريحة الكوميديا نفسها لم نرها فى الفيلم، او حتي اى شىء قريب من الكوميديا بحال من الاحوال!
الفيلم بيعتمد على تيمة واحدة هى : موردخاي يقع فى مشكلة .. بعض المفارقات الكوميدية .. صديق موردخاي ينقذه .. موردخاي يحاول اغواء زوجته .. موردخاي يقع فى مشكلة .. مفارقاات كوميدية .. صديقه ينقذه .. يحاول اغواء …. الخ … الخ … الخ!
طوال فترة مشاهدتنا للفيلم كنا بنتفرج على امل نشوف اى تغيير فى السيناريو، لكن دي كانت الحقيقة، مع بعض الرتوش الجانبية الغير مفيده او مهمة، قد نكون ابتسمنا مرة او اتنين، لكن الغيظ والاحساس بالمهانة سيطروا علينا لبقية الفيلم!
قد يكون الفيلم مضحك للناس اللى بتحب الافلام اللى بتتكلم على اختلاف الثقافات بين البريطانيين والامريكيين، الامر اللى بيظهر بشدة لما بيسافر موردخاي (الانجليزي العتيق) للولايات المتحدة، وبيشوف نمط الحياة المختلفة هناك، لكن بتظل منطقة الدعابة مقصورة على عينة محددة من الجماهير اللى ممكن يكونوا قليلين فى مصر، وعلى الرغم من فهمنا لاسلوب الدعابه ده، الا اننا ما ضحكناش برضو.
الديكورات والموسيقي التصويرية كانت بنفس جودة الفيلم، عادية ومافيهاش جديد، قد تكون بعض المؤثرات الخاصة بتنقل موردخاي من بلد لبلد واظهار الانتقال على الشاشة من خلال طائرة بتطير بين اسامي البلاد، قد يكون ده تاثير كويس، لكن بالنسبه لحجم الفيلم ومستوي الانفاق عليه بنعتبر دي ميزة بسيطة ولا تستحق السرد، لكننا بنحاول نعثر للفيلم على اى حسنة ومش لاقيين!
المشاهد الجنسية فى الفيلم محذوفه بفعل الرقابة المصرية، بالتالى نعتقد ان الشباب من سن 16 ممكن يشاهدوا الفيلم، على الرغم من تصنيفه فى الولايات المتحدة كفيلم من النوعية R لـ(some language and sexual material) لكننا لم نشعر بحذف العديد من المشاهد من الفيلم.
الشىء الوحيد اللى ممكن يدفعكم كمشاهدين لدخول Mortdecai ، هو العشق الشديد لجوني ديب، اى شىء اخر غير الدافع ده، ننصحكم ساعتها تشاهدوا فيلم اخر توفيرا للمال والوقت.
