Mother’s Day: إهداء لكل الأمهات
إحنا ممكن نخلص موضوعنا هنا فى الكلام عن عظمة الأم وعظمة الدور اللى بتلعبه فى حياتنا، وإن منغيرها فعلاً حياة البشر كلها كانت هاتكون أصعب وأشقى وأكتر مأساوية.. الأم هى جهاز عطاء شغال على مدار الساعة، فى صمت وعظمة وإنكار ذات مش موجود عند حد تاني.. وبمناسبة عيد الأم العالمي تم إصدار فيلم اليوم.. واللى يعتبر إهداء خفيف لكل أم فى عيدها.
من تأليف توم هاينز وإخراج جاري مارشال وبطولة جينفر انيستون وجوليا روبرتس و كيت هيدسون بنشوف قصة مجموعة من الأمهات من أجيال مختلفة بيجتمعوا فى مكان واحد فى يوم عيد الأم.. اللقاء واللى بيحصل قبله وبعده بيفجر مجموعة من المواقف الكوميدية والرومانسية على حد سواء، واللى بنعرف من خلالها قيمة الام فى حياتنا وأهمية دورها اللى بتلعبه على إختلاف الأجيال.
على الرغم من إن الفيلم عن الأمهات والعلاقه بينهم وبين الأبناء، حسينا بأد ايه المجتمع الأمريكي بيعاني من مشاكل كبيرة، زي مثلا مشكلة الـ Single Mothers وهى الأمهات اللى بتضطر تلعب دور الأب والأم فى حياة الأبناء لغياب الأب بسبب الطلاق أو أي مشاكل تانيه، والحقيقة إننا بعد تفكير حسينا إن المشاكل دي مش بس موجوده عند الغرب بس، مجتمعاتنا العربية كمان بدأت تعاني تقريباً من نفس المشاكل.
على الرغم من الأسامي القوية جدا فى الفيلم، إلا أن الاداء التمثيلي كان مخلص أكتر لمنطقة الفيلم الـ Light اللى مش عاوز يقدم أكتر من شويه كوميديا وشويه رومانسيه وطبعاً شويه تراجيديا خاصة فى الربع الأخير من الفيلم.
زي ما قولنا التمثيل مكانش بقدر قوة الأسماء المشاركة خاصة من جوليا روبرتس واللى كان ظهورها اشبه بضيفة الشرف، أما جينفر انيستون فا لفت انتباهنا قدرتها على الحفاظ على شكلها وجسمها على الرغم من تقدمها فى السن، ونتمني النجمات المصريات يتعلموا منها درس فى كيفية الحفاظ على شكلهن خصوصاً مع التقدم فى السن.
الموسيقي التصويرية كانت جميله لكن ما حسيناش انها علقت فى ذهننا بعد مشاهده الفيلم، على العكس من الديكورات اللى كانت جميله ومريحة للاعصاب وزوايا التصوير اللى لعبت دور مهم فى عدم احساسنا بالملل علي الرغم من تسرب الملل لينا فى بعض المشاهد النهائية للاحداث.
Mother’s Day فيلم عارف كويس هو بيقدم ايه.. شويه حاجات Light فى ذكري عيد الأم وتكون المحصلة النهائية فيلم متوسط ممكن تشوفه مع ست الحبايب فى الويك اند.
