Ms. Marvel : المعايير الجديدة للسوبر هيرو في أعمال مارفل

انتقادات واسعة كانت بتوجه لعملاق الإنتاج السينمائي (مارفل)، أن ماعندهاش تنوع في الأبطال الخارقين اللي بتقدمهم في أعمالها. وكأن البطل الخارق لازم يكون، رجل، أبيض، أمريكي الجنسية والثقافة.

من فترة بدات مارفل في تغيير سياستها، وده كان واضح مع تقديم شخصية Black Panther  اللي قام بأداء الشخصية الممثل الأسمر الشهير شادويك بوسيمان. لكن واضح أن مارفل في المسلسل القصير Ms. Marvel قررت تقدم لنا بطل خارق، يتحدى كل المعايير القديمة. ويضع بنفسه معايير جديدة تماما.

في البداية كان لازم نقول (تضع) معايير جديدة. لأن بطلة Ms. Marvel – زي ما هو واضح من الأسم- هي بنت، وباكستانية مش أمريكية، و -استعدوا للمفاجأة- مُسلمة. وطبعا مش بيضاء البشرة.

مارفل مش مكسوفة من التعبير عن تغييرها القواعد بوضوح وصراحة، حتى أن كاميلا خان بطلة المسلسل بتقول في واحد من المشاهد لصديقها: انا عمري ما شوفت سوبر هيرو مش أبيض البشرة، أو من أصول غير أمريكية.

وكأن التجديد في قواعد السوبر هيرو في Ms. Marvel كان أكتر من كافي لمارفل، بنشوف القصة التقليدية لكل سوبر هيرو تاني. كاميلا خان (قامت بالدور الكندية من أصل باكستاني ايمان فيلاني) هي بنت مسلمة أمريكية من أصول باكستانية، عايزه يكون لها طريقها واختياراتها الشخصية في الحياة، بينما أهلها بيصادروا عليها أبسط حقوقها في حضور حفلة تنكرية، بسبب أنهم أسرة محافظة. لكنها بتحصل بطريقة ما على أداه بتعطيها طاقة خارقه، وتبدأ تتطور الأحداث علشان نشوف هاتستغل الطاقة دي ازاي.

اخراج Ms. Marvel كان واحد من أهم عوامل تميزه. كل البيئة اللي بتدور فيها الأحداث بتساعدنا على الوصول لعقل ودماغ الشخصيات. زي أننا نشوف الجمل الحوارية بين الأبطال لما بيبعتوا لبعض رسايل، وهي مكتوبة على أرضية الشوارع بدل كتابتها بطريقتها التقليدية في بالونات فوق راس الشخصيات زي ما بنشوف دايما. كمان عجبنا طريقة المزج بين خيال الأبطال وبين المشاهد على الشاشة، علشان نشوف تميز بصري مش بنشوفه بقى لنا فترة في مختلف الأعمال الدرامية. ويمكن هانلاحظ اختلاف في بعض العادات الإسلامية اللي بيعرضها المسلسل عن حياة المسلمين في المنطقة العربية، لكن ما تنسوش أننا بنشوف المرة دي الإسلام بعيون باكستانية مش عربية. ودي فرصة جديدة علشان نتعرف على جوانب مختلفة لحياة ناس من أصول/ أديان مختلفة عن الدولة اللي عايشين فيها.

تفاصيل قد تبدو صغيرة، لكن محبي عالم مارفل السينمائي، ومهاوويس عوالم السوبر هيروز، هايشوفوا في Ms. Marvel عمل شيق جدا، خاصة في تترات البداية والنهاية، مع المشهد المهم اللي بنشوفه بعد نهاية عرض الأسماء على الشاشة، وهي عادة عودنا عليها مارفل، وبيكون فيه تلميح لأحداث قادمة في باقي الحلقات. كل دي حاجات خلتنا مستنيين الحلقات القادمة من Ms. Marvel على أحر من الجمر. علشان نشوف بطلة مارفل الجديدة اللي كسرت كل قواعدها القديمة.. هاتنجح في امتاعنا ولا هاتفشل؟!