My Big Fat Greek Wedding 2 : جزء ثاني كوميدي وخفيف
الأسرة هى الكيان الصغير اللى بيضمنا فى أحضانه من الصغر حتي الكبر، وهى الحضن الكبير اللى بنلجأ له لما نبقى عاوزين نـ… إيه الكلام الكبير اللى إحنا بنقوله ده؟! الحقيقة إن الأسرة ومفهمومها كان مجرد مدخل لصناع الجزء الثاني من فيلم My Big Fat Greek Wedding علشان يقدموا لنا الكوميديا بتاعتهم.. لكن هل نجحوا؟
من إخراج كيرك جونس وبطولة نيا فاردوليس و جون كوربيت و ريتا ويلسون بنشوف قصة عائلة يونانية كبيرة ومجنونة تماما، بداية من الأب والأم الكبار وحتي أفراد الأسرة واحد واحد، الأمر اللى بيضع ابنتهم الصغيرة (الينا كامبورس) فى مواقف كتير محرجة و كوميدية فى نفس الوقت.
على الرغم من بساطة القصة وعدم وجود Twist فى الأحداث يغير كل شىء ويقلب الدنيا رأساً على عقب، إلا إن نسبة الكوميدية اللى خرجنا بيها من أحداث الفيلم كانت جيدة وشيقة جدا وجديدة فى نوعيتها، وإن كنا محتاجين من الكوميديا تكون أكثر تركيزا ويكون الفيلم أكتر إخلاصاً لها.
الأداء التمثيلي لكل الأبطال كان عظيم جدا، كل واحد كان عارف إمتي بتبدأ حدود دوره وإمتي بتنتهي، وكان مفهوم جداً التنوع العمري للشخصيات الخاصة بالفيلم، بالتالى كل ممثل كان عارف حدود سنه والمسموح له فى الأداء يبدأ فين وينتهي فين، وعلى الرغم من وجود شخصيات كتيرة من شخصيات الفيلم سنها كبير، إلا أن روح الفيلم الشبابية كانت طاغية على الجميع وقدمت عرض كوميدي خفيف وظريف.
الموسيقي التصويرية حسينا إن دورها مش قوي زي ما كنا متخيلين، يمكن بسبب الطبيعة الكوميدية للأحداث اللى بتخلى التركيز مع الأحداث أكتر من التركيز مع الموسيقي فى الخلفية، أو يمكن صناع الفيلم نفسهم كانوا عاوزين يقللوا من سطوة الموسيقي على حساب سيطرة الأحداث.
My Big Fat Greek Wedding من نوعية الأفلام اللى الكلام عنها ممكن يكون قليل، لكنها بتوفر فى النهاية مباراة كوميدية جميلة، فقط كنا متوقعين زيادة نسبة الكوميديا عن كده، والإهتمام بباقى عناصر الفيلم بالتوازي مع القصة، لكن الفيلم فى مجمله جميل وجدير بالمشاهده من محبى الأفلام الكوميديه.
