Night at the Museum: Secret of the Tomb : التريلر حرق الفيلم!
التريلرز، او الأعلانات الخاصة بالافلام، لها انواع، نوع بيرتفع بالفيلم لسابع سما، ونوع ينخفض بالفيلم لسابع ارض، ونوع زي اللى شوفناه فى فيلم النهرده، حرق معظم المشاهد الكوميدية، وتركنا مع بعض المشاهد المقتطعة من هنا وهناك، بشكل افسد الفيلم وحرق الكوميديا اللى بسببها بيتابع المشاهد سلسلة افلام Night at the museum
من اخراج شون ليفي، ومن بطولة بين ستيلر،روبن ويليامز،اوين ويلسون و ستيف كوجان، بنشوف مغامرة حارس المتحف (لاري)، اللى بيتورط فى محاولة انقاذ مجموعة من التماثيل الموجودة فى احد المتاحف، واللى بيتمتعوا بقدرة سحرية بتخليهم يرجعوا للحياة تاني كل ليلة، بيحاول ينقذهم من مصير محتم بالهلاك، بعد تعرض اللوح السحري اللى بيكسبهم قدراتهم للتلف لسبب غامض.
كلنا عارفين ان القصة هنا مش مهمة، وان المهم هو المشاهد الكوميدية اللى بيأديها ابطال العمل، بالتالى كان من الممكن اننا نتغاضى عن القصة او اى مشاكل في السيناريو وتتابع الاحداث، فى مقابل جرعة الكوميديا المكثفة اللى كنا بنتوقع الحصول عليها من كل مشهد وكل حدث من احداث الفيلم، لكن فى الحقيقة جاء الواقع بكوميديا اقل بكتير من توقعاتنا، ومن توقعات باقى المشاهدين اللى قدرنا نحصى عدد مرات ضحكهم على اصابع اليد الواحدة!
الأداء التمثيلي للأبطال لم يكن بالقوة اللى توقعناها، لكن (بن ستيلر) قدر يقدم دور كويس بالاشتراك مع روبن ويليامز، الثنائى اللى قدروا يظبطوا انفعالاتهم وادائهم للشخصيات بشكل كويس ومتناسب مع الخيط العام للاحداث على مدار الفيلم.
الفيلم بيعتمد على الكثير من الايفيهات من الأجزاء السابقة، بالتالى حسينا انه لم يقدم جديد، لكن بعض المشاهد الاخري كانت مبتكرة وفعلا جعلتنا نضحك من قلبنا، لكنها للاسف كانت قليلة ومبتورة، وكنا نتوقع يتم زيادة وقتها على الشاشة اكتر من الشكل اللى شوفناه لكن للاسف خابت توقعاتنا مع الفيلم.
الشىء المتميز فى الفيلم فعلا هو مستوي الخدع السينمائية والمؤثرات الخاصة، وخصوصا اسلوب حركة الديناصورات والهياكل العظمية، جرافيك ومؤثرات على مستوي متميز، واسلوب تحريك عالى جدا واحترافى الى ابعد الحدود، وديكورات قوية ومؤثرة ودخلتنا فى مود الفيلم بسرعه واقتدار، ويمكن دي الحسنة الوحيدة للفيلم.
الجزء الاخير من Night at the museum بننصحكم بيه لو كنتم عاوزين تشوفوا فيلم متوسط الكوميديا، مع كثير من الابهار فيما يتعلق بالخدع السينمائية والمؤثرات الخاصة . ما تتوقعوش اكتر من كده من الفيلم ده.
