Night Hunter : أتبسطنا بالفيلم أكتر من توقعاتنا
قبل ما نتفرج على أي فيلم بنحب نكون فكرة عنه.. من خلال قراية القصة ومشاهدة الإعلان ومتابعة تقييمه على المواقع الأجنبية. والحقيقة أن التوقع اللي حسينا بيه ناحية Night Hunter انه هايكون فيلم نمطي وتقليدي عن قاتل متسلسل. لكن هل ده اللي لاقيناه؟
أحداث Night Hunter بتدور عن محاولة الإيقاع بقاتل متسلسل متخصص في خطف النساء والاعتداء عليهن وقتلهن. لكن في طريق الإيقاع بالقاتل بندخل في حلقة متصلة من الغموض ومحاولة حل لغز عمليات الاعتداء والقتل.
الفيلم من اخراج وتاليف ديفيد رايموند والحقيقة انه قدر يقدم صورة مش نمطية للقاتل المتسلسل، لكنه فشل من ناحية تانيه في جعلنا نتعاطف مع الشخصيات. خاصة الشخصيات الثانوية اللي بتظهر وتختفي بدون أي تاريخ سابق لها او محاولة السيناريو انه يعرفنا اكتر عنها. علشان كده حسينا بعدم الترابط بين الشخصيات وبعضها.
لكن اللي انقذ الفيلم من الفشل كان الأداء التمثيلي من هنري كافيل و بن كينجسلي واللي قدروا يقدموا أداء تمثيلي جيد جدا. تناغم مع ديكورات الفيلم وموسيقته التصويرية واللي قدروا ينقلونا لموقع الاحداث ويخلونا نحس بكل مشهد بشكل مختلف وجديد.
هل معنى كلامنا ان Night Hunter هو أحسن فيلم نشوفه عن قاتل متسلسل؟ لا طبعا لان الفيلم – رغم كل المجهودات – قدم لنا في النهاية احداث قابلة للأستنتاج وحبكة متكررة مع كل الأفلام اللي من النوعية دي. لكن بأداء تمثيلي افضل وديكورات اكثر واقعية.
Night Hunter لو كان اشتغل على الحبكة بشكل افضل كان ممكن يكون فيلم افضل. لكن يظل فيلم مناسب للناس اللي مش عاوزه تفكر كتير وفي نفس الوقت تشوف احداث مثيرة ولغز – مش صعب على الفهم- لكن جدير بالمتابعة في نفس الوقت.
