Nightworld: Door of Hell : ليالي الرعب في بلغاريا!
مهما كان فيلم الرعب اللي بنشوفه مختلف ومتغير عن باقي الأفلام. هايفضل يدور في مجموعة من التيمات والأفكار اللي شوفناها قبل كده. لكن واحدة من تيمات الأفكار اللي نادرا ما بنشوف أفلام بخصوصها هي تيمة المنازل أو الأماكن القديمة اللي نحس ان لها كيان منفرد. كيان مرعب وأحداث بتحصل تحت السطح الهادي للسيناريو.
Nightworld: Door of Hell بيلعب على فكرة المنزل المسكون أو اللي بتحصل فيه أحداث ما ورائية. وكل ده بيحصل لما بيتولى ضابط سابق مهمة الأمن في المبنى القديم. ولما بيبدأ يعرف أكتر عن تاريخ المكان بيكتشف أسباب الأحداث الغامضة اللي بتحصل طوال الوقت.
من أكبر مشاكل الفيلم هي الميزانية المحدودة اللي بيتحرك فيها. الميزانية اللي فرضت اختيار ممثلين معينين وديكورات معينة وأماكن تصوير معينة. وللأسف الشديد فشل المخرج باتريشيو فالادريس في محاولة تطويع الميزانية المحدودة علشان يقدم فيلم جيد وغير مكلف في نفس الوقت. طيب ايه الكويس في الفيلم؟
الأداء التمثيلي من جاسون لندن و روبرت انجلند و باقي فريق الممثلين كان جيد جدا. وكل ممثل كان عارف أبعاد الشخصية اللي بيقوم بيها بشكل جيد. والأداء التمثيلي كان أفضل من استخدام المؤثرات الخاصة اللي كان سىء جدا لان كان له علاقة مباشرة بميزانية الفيلم اللي كانت قليلة.
لو كنت من محبي أفلام الرعب على أي وضع. فيلم Nightworld: Door of Hell هايعجبكم. أما لو كنتم من الناس اللي بتختار الأفلام اللي بتدخلها باهتمام شديد ومش بتحب تمشي حالها مع أي تقصير في الفيلم. مش هايعجبكم الفيلم.
