Nine Lives : ضربة غير متوقعة من كيفن سبيسي
لو كان للقط سبع أرواح زي ما بيقول المثل الشعبي المصري، ولو كان للقط تسع أرواح زي ما بيقول المثل الأجنبي… يبقى أكيد للفنان كيفن سبيسي ألف وجه ووجه علشان يقدر يبهرنا بالشكل ده ويقدم لنا الأداء التمثيلي المتميز ده… لكن للأسف يعيب الفيلم اعتماده الأول والأخير على أداء كيفن سبيسيى لا أكثر ولا أقل.
فيلم Nine Lives بطولة كيفين سبيسي، وجنيفر جارنر، وكريستوفر والكن، وتيدي سيرس، وروبي آميل، ومن تأليف دان أنتونيازي، وبين شيفرين، وإخراج باري سوننفيلد. وبيحكي عن رجل أعمال بيحاول ينفذ حلمه ببناء أكبر ناطحة سحاب فى القارة، لكن إهتمامه بشغله بيبعده عن أسرته واهتمامه بيهم، ثم بيتعرض لحادثة بتحصل له بعدها مشكلة فانتازية، هى إنه بيتحول لقطه! وبيبدأ يحاول يهتم بأسرته ويلفت انتباههم له علشان يضمن إنه مش هايستمر فى حياته كلها متجسداً فى جسد قطه!
كيفن سبيسي بطل الفيلم للى مايعرفوش، ممثل متميز جداً واشتهر بأداء دور الرئيس الأمريكي (فرانك أندروود) فى المسلسل الخيالى House Of Cards واللى بيتعرض حصرياً على شبكة Netflex
نوعية أدوار كيفن سبيسي بعيدة فى غالبيتها عن الكوميديا، علشان كده لما يقوم بدور كوميدي بالشكل ده وبأداء صوتي متميز فى النصف الثاني من الفيلم، كل دي أمور بتخلينا نحس إن فعلا سبيسي ممثل متميز وقادر على (بلع) أي ممثل تاني يقف معاه على الساحة السينمائية فى الفيلم اللى بيقوم ببطولته.
ديكورات الفيلم وخصوصا ديكورات منزل (كيفن) متميزة جدا ومبهرة بما لا يتناسب مع فيلم كوميدي، على العكس من الموسيقي التصويرية اللى كانت ضعيفة و(ماعلمتش) فى دماغنا زي ما كنا متوقعين، والموسيقي التصويرية مش من العوامل اللى بيتم التركيز عليها فى المقام الأول فى الأفلام الكوميدية، لكن لما الموسيقي بتكون جذابة ومتميزة فى الفيلم –مهما كان نوعه- بتكون نقطة مهمة بنحب نركز عليها.
الفيلم بيلقي الضوء على العلاقات الأسرية المفككة فى الغرب، ومش ده الفيلم الوحيد اللى ناقش النقطة دي وشوفنا أفلام كتير بتناقش القضية دي، وللأسف النهردة فى مجتمعاتنا العربية بنلاحظ إنفصال الناس عن بعضها البعض، وعدم وجود علاقات أسرية قوية زي زمان، والحقيقة إننا بنتحول تدريجياً لنمط الحياة الغربى والمفروض إن فيلم زي Nine Lives يلفت انتباهنا لأمور زي دي.
