Non stop : فيلم أكشن متميز

(ليم نيسون) مواليد 1952 واحد من افضل فنانين هوليود على الاطلاق، والحقيقه ان مجرد وجود اسمه على تتر اى فيلم بيعرفنا ان الفيلم ها يكون قوى ومتميز . و Non stop مجرد اثبات لاستمرار القاعدة دى .

الفيلم من اخراج جومى كوليت سيرا وبيحكي عن رجل امن مهمته تأمين الرحلات الجوية ، بيتعرض لتهديد من مختطف مجهول فى احد الرحلات ، بيطلب منه تحويل مبلغ 150 مليون دولار على حساب معين فى البنك والا ها يقتل راكب على متن الطائرة كل 20 دقيقة .

الأحداث بتتطور مع الوقت ومش عاوزين نحرقها عليكم اكتر من كده ، لكن لازم تبقوا عارفين ان اختطاف الطائرة هو مجرد حلقة صغيرة من ضمن حلقات كبيرة من الاثاره اللى مش بتتوقف من اللحظة الاولى وحتى نهاية الاحداث

على الرغم ان تقريبا الفيلم بالكامل تم تصويرة فى لوكيشن واحد داخلى (طائرة نفاثة مدنية) الا ان الملل ما اتسربش جوانا على مدار حوالى ساعتين هم عمر الفيلم ، وكنا طول الوقت مشدودين للاحداث بشده احنا وباقى المشاهدين اللى اقبلوا على الفيلم بسبب سمعة ليم نيسون الممتازة ، وكان اقبالهم كبير لدرجة انه تم تخصيص قاعتين كاملتين لعرض الفيلم

من المرات النادرة اللى بيتم اظهار العرب والمسلمين بصورة كويسة ، من خلال التعرض لشخصية طبيب مسلم كان على متن  الطائرة ، وازاى انه كان موضع شبهات للجميع ثم بيتاكدوا انه شخص صالح وبيساعدهم فى انقاذ المصابين على متن الطائرة .

Non stop قد يبدوا من اعلانه انه فيلم اكشن ، الا انه فى اعتقادنا انه فيلم جريمه وتشويق بالدرجة الاولى ثم ياتى الاكشن وضرب الرصاص كقطعة كريز على رأس التورته ..

الفيلم ممتاز لو كنتم من عشاق الاكشن او من عشاق ليم نيسون زينا ، وعلى كل حال نوعدكم تفضلوا مشدودين من المشهد الاول لنهاية الفيلم بلا انقطع .. مستنيين رايكم