Now You See Me 2 : جولة جديدة فى عالم السحر
جلا جلا! قرب قرب! الساحر العجيب هايقدم لكم عرض جديد ومختلف جداً عن أي عرض تاني ممكن تشوفوه.. هي دي الكلمات السحرية اللى بيجذبنا بيها أي ساحر علشان نشوف العرض بتاعه، وبينما بيوهمنا وبيجبرنا على التركيز فى ايده اللى ماسكه العصايه بيكون بيحضر نفسه علشان يطلع لنا الأرنب من القميص بتاعه.. هي دي كانت فكرتنا عن السحر لحد ما شوفنا فيلم Now You see me فى الجزء الأول منه واللى كان عظيم جدا.. والنهرده جه اليوم اللى نشوف الجزء التاني علشان نستمتع بجولة جديدة من السحر والأبهار.
من إخراج جون ام تشو وبطولة دانيال رادكليف وودى هاريلسون مارك روفالو جيسى ايزنبرج مايكل كين جاي تشو بنشوف استكمال للجزء السابق من الأحداث، واللى الفيلم بيبدأ بمشاهد افتتاحية بيتم الشرح فيها للمشاهدين اللى بيشوفوا الفيلم للمرة الأولي بدون متابعة الجزء الأول، وفى خلال دقايق معدودة بيصبح كل المشاهدين عارفين نفس المعلومات اللى المفروض يعرفوها.
وكأن التعقيد كان غير كافي فى الجزء الأول، الفيلم بياخدنا فى حاله من التعقيد الشديد للألعاب السحرية اللى بيمارسها مجموعة من السحرة المحترفين، واللى بيلعبوا بإسلوب روبن هود فى إعادة توزيع الثروة على الفقراء بعد سرقتها من الأغنياء.. السحره أبطال الفيلم واللى بيسموهم (الفرسان) بيحركهم تنظيم سري إسمه (العين) بيشتغل لحسابه الفنان مورجان فريمان واللى بيعرفنا معلومات أكتر عنه وعن طريقة عمله.
المشكلة أن التعقيد الشديد وغموض الأحداث دخلنا فى حالة من عدم الفهم، وحسينا إننا زي الأطرش فى الزفة، ومع الوقت بدأنا نفهم الأحداث شويه لكن لحد لما جه الوقت ده كان أصابنا بعض الحيرة والتخبط وعدم فهم أحداث الفيلم وده فى رأينا كان غير إيجابى لأن الفارق بين التشويق والغموض وبين إحساس المشاهد بالغباء وعدم الفهم فارق كبير جداً.
الجميل فى الفيلم الحس الكوميدي اللى كان عالى جدا، خاصة فى مشهد زي مشهد إخفاء كارت الكوتشينة من الفريق الأمني كان مشهد فى غاية الإثارة والذكاء والكوميديا، والحقيقة إنه واحد من أفضل المشاهد اللى شوفناها فى مؤخراً فى الأفلام اللى من النوعية دي ومش عاوزين نحرق عليكم الأحداث وبننصحكم تشوفوا المشهد بنفسكم وتحكموا عليه.
الموسيقي التصويرية للفيلم كانت مميزة وقوية جدا.. حماسيه وسرقت أذاننا من اللحظة الأولي للنهاية بلا توقف وكان صناعها عارفين إمتي تبدأ الموسيقي وإمتي تتوقف وإمتي تعلو وإمتي تهبط، ودي نقط مهمة جداً بتعرفنا إن المسئولين عن الموسيقي فى الفيلم كانوا محترفين وعارفين شغلهم صح.
لو كنت من محبى السحر والخدع السحرية وألعاب الذكاء والمطاردات الذكية.. ما تضيع وقت وشوف الجزء التاني من Now You See Me ولو ماشوفتش الجزء الأول ننصحك تشوفه قبل مشاهدة الفيلم لمزيد من المتعة والخيال والأثارة.
