Office Christmas Party : كوميديا الأعياد

موسم الأعياد من أكتر المواسم اللى ممكن يتقدم فيها أفلام خفيفة وكوميدية وتقدر تحقق نجاح كبير، وتجذب شريحة كبيرة من الجمهور اللى عاوز يقضى ساعة ونصف أو ساعتين فى متابعة أحداث كوميدية لطيفة… وموسم الأعياد يخلص وكل سنة وانتوا طيبين.

Office Christmas Party من إخراج جوش جوردون وتأليف جاستن مالين وبطولة جاسون بيتمان و  أوليفيا مان و  تى جى ميلر و جينفر أنيستون و جيمي تشونغ و ​كيت ماكينون.

الفيلم بيحكي عن أحد فروع الشركات الكبري العاملة فى مجال الإتصالات وتكنولوجيا المعلومات. الفرع بيحقق خسائر كبيرة، علشان كده بتروح مديرة الشركة (جنيفر انيستون) علشان تدرس وضع الفرع وتقرر إغلاقه، على الرغم من العلاقة الأسرية اللى بتجمع مدير الفرع بمديرة الشركة.

علشان يمنعها من إغلاق الفرع بيحاول المدير عمل صفقة ضخمة مع أحد المديرين.. وفى سبيل إقناعه بقبول الصفقة، بينظم على شرفه حفلة ضخمة أثناء الكريسماس.. ومن هنا بتبدأ أحداث الفيلم الحقيقية,

مشكلتنا مع سيناريو الفيلم إنه أخر الجزء الخاص بالحفلة لقرب نهاية أحداث الفيلم، على الرغم من أنها المنطقة الأساسية اللى بتنتطلق منها أحداث الفيلم الحقيقية، وده أجل الكوميديا الأساسية فى الفيلم لجزء متأخر، كمان بنعيب على الفيلم أن جرعة الكوميديا كانت أقل بكتير مما كنا متوقعين على الرغم من فريق العمل المشهود له بالكوميديا الخارقة فى أعمال تانيه. ومن هنا بنستنتج أن العيب فى السيناريو مش فى الإخراج والتمثيل.

الديكورات والإضاءة كانت من أهم عوامل قوة الفيلم، وقدرت الديكورات تعكس لنا حياة المكاتب فى المجتمع الأمريكي، وإزاي يقدر مجموعة من العاملين تحويل الشركة اللى بيشتغلوا فيها لملهي ليلي متكامل لما يكونوا عاوزين! أيضا المشاهد النهائية للفيلم واللى تم تقديم مشاهد أكشن بالسيارات كانت مشاهد قوية ومؤثرة فى الأحداث.

الأداء التمثيلي للمشاركين فى الفيلم وأبطاله كانت ضعيفة، وحسينا بشكل أو بأخر أن الأداء التمثيلي كان بارد ومفتقد للحيوية… يمكن بنفس قدر برودة الطقس اللى تم تصوير الفيلم فيه، وكان واضح أن كل المشاركين فى الفيلم مش بيعطوه حقه بالكامل فيما يتعلق بالمجهود التمثيلي، الإخراج المتكاسل كمان كان نقطة ضعف أساسية فى الفيلم.

من الأخر فيلم Office Christmas Party فيلم مناسب للخروجات العائلية فى موسم الأجازات، لكن بلاش تتوقعوا منه يكون أفضل فيلم تشوفوه فى حياتكم. وننصحكم بمشاهدته فى موسم الأجازات مش قبلها أو بعدها.

علشان تبقى عارف:

• كلُ من (مات والاش، سام ريتشاردسون، وراندال بارك) ظهر في العرض التليفزيوني (Veep) عام 2012.
• اسم الفيلم مُستوحى من إسكتش بإحدى حلقات برنامج (SNL) بنفس العنوان (Office Christmas Party).
• (جايمي تشانج، وتي جيه ميلر) أدوا الأداءات الصوتية لـ(جوجو، وفريد) في فيلم (Big Hero 6).