On the Basis of Sex : صرخة سينمائية في وجه التفرقة
روث بادر جينسبرج مش مجرد قاضية في محكمة أمريكية. هي واحدة من 4 سيدات على مستوى الولايات المتحدة وصلوا للمنصب ده في تاريخها. وثاني واحدة على مستوى أمريكا تتولى منصبها. وده حصل نتيجة رحلة طويلة من الكفاح ضد التمييز على أساس الجنس بنشوفها من خلال فيلم On the Basis of Sex.
من أجمل الحاجات اللي عجبتنا في الفيلم هي أنه مقتبس عن قصة حقيقية. والحقيقة أننا هانشوف أفلام كتير مقتبسة عن قصص حقيقية في الفترة القادمة علشان معظمها بيتنافس على الفوز بجائزة الأوسكار اللي بتهتم في الغالب بالأفلام المقتبسة عن قصص واقعية.
المخرجة ميمي ليدر كان من الواضح اعجابها بالنص المكتوب من دانيال ستيبلمان. علشان كده قدرت تقدم لنا فيلم مترابط وقوي. وكان اختيارها لـ فيليستي جونز اختيار موفق الى أبعد الحدود. واللي على الرغم من أدوارها اللي كانت بتظهر في معظمها كدور مساند ومساعد لدور ذكوري، زي دورها في Inferno (2016) أو The Theory of Everything (2014) إلا أنها قدرت تأدي دورها بدور مميز جدا وأعطى الفيلم روح وتألق عالي.
من الحاجات اللي ماعجبتناش في الفيلم بعض الملل اللي تسلل لنا في أحداث منتصف الفيلم. على الرغم من الإيقاع السريع في بداية ونهاية الأحداث.. لكن حسينا أن السيناريو (نايم) شوية في منطقة نصف الأحداث. لكن بعد كده الأحداث بتكون أسرع.
الفيلم مش هايكون مناسب أبدا لأصحاب التفكير المحافظ أو الناس الغير مناصرة لحقوق ونضال المرأة وحقها في المساواة. أما بعض مستخدمي مواقع التواصل الأجتماعي للأسف فهموا العنوان بشكل غلط وأخدوا فكرة غلط عن الفيلم حتى بدون معرفة أي شيء عن قصته!
On the Basis of Sex فيلم مناسب جدا للشابات والسيدات المهتمات بنضال المرأة علشان حقوقها. وطبعا لباقي المشاهدين. لكن الجنس اللطيف هايلاقوا في الفيلم متعة إضافية.