Once Upon a Time in Venice: كوميديا الصيف المجنونة.

ارتباط الكوميديا بالصيف مش بينتهي. وفيلم Once Upon a Time in Venice رغم أنه مش أفضل فيلم كوميدي شوفناه في الموسم، لكنه يعتبر من الأفلام الكوميدية اللي يجب مشاهدتها في صيف 2017.

القصة

الفيلم بيحكي عن قصة المحقق الخاص ستيف، واللي بيدخل في صراع لا ينتهي مع أحد العصابات واللي بيسرقوا كل شيء في منزله بما فيه الكلبة الأليفة الخاصة به. الأمر اللي بيدخله في صراع ملىء بالمواقف الكوميدية واللي مش بتنتهي لحد نهاية أحداث الفيلم.

فريق العمل

الفيلم من أخراج مارك وروب كولين ومن تأليفهم أيضا، أما البطولة فكانت من نصيب بروس ويلز في دور ستيف و جون جودمان و جايسون مومو و إليزابيث روهم.

الأداء التمثيلي

على الرغم من تقدمه في العمر الا أن بروس ويلز قدر يقدم دور قوي ومتميز وكوميدي والحقيقة أن ويلز بيقدر يثبت في جميع أدواره قدرته على القيام بأي شخصية يقوم بيها سواء كانت أكشن أو دراما أو حتى كوميديا زي ما شوفنا في أحداث Once Upon a Time in Venice.

السيناريو والحوار والأخراج

سيناريو الفيلم اتسم بالسرعة الشديدة من أول مشهد لأخر مشهد، بدون ما يترك المجال للمشاهدين للشعور بالملل، وده أمر يحسب على صناع الفيلم والمخرج بشكل أساسي، كمان كوميديا الفيلم اعتمدت بشكل كبير على الحوار المميز والفعال والكوميدي الى اقصى حد، بالإضافة لكتير من المشاهد الكوميدية واللي تميز فيها بروس ويلز بشكل كبير.

الديكورات والموسيقى والأزياء

للأسف الفيلم كان غير مميز على مستوى الديكورات أو الموسيقى أو الأزياء، وكأن صناع الفيلم قرروا تغليب الكوميديا على أي شيء أخر، وتقديم مستوى كوميدي عالي على حساب باقي عناصر الفيلم. لكن في النهاية تبقى الكوميديا هي المسيطرة على الموقف وهى اللي بيسعي لها المشاهدين بغض النظر عن باقي عناصر الفيلم.

الخلاصة

Once Upon a Time in Venice جرعة كوميدية صيفية جميلة، لكن ما تتوقعوش من الفيلم ما هو أكثر من مجرد الكوميديا سواء على مستوى الحوار أو السيناريو.

علشان تبقى عارف:

تقييم الفيلم على IMDB 5.3 من 10 بعد تصويت حوالي 6000 مستخدم للموقع.