One Piece: Stampede : يا قراصنة العالم… اتحدوا!
ناس كتير بتنظر للأنيميشن الياباني على أنه أصل فن الأنيميشن بشكل عام حول العالم. والحقيقة أن نظرتهم دي مش غلط بنسبة ١٠٠٪. لأن اليابان عودتنا طوال الوقت على طريقتها الخاصة والممتعة في تقديم فن الأنيميشن. و One Piece: Stampede يعتبر مجرد تأكيد على تفرد اليابان في الفن ده.
One Piece: Stampede بيحكي عن مجموعة من القراصنة بتجتمع من كل مكان في العالم من أجل البحث عن كنز كبير جدا. لكن المميز في القصة أن عملية البحث نفسها مش هي المحرك الأساسي للأحداث لكن التفاصيل الجانبية اللي بنشوفها طوال الوقت هي الأكثر متعة.
مجرد ما شاهدنا One Piece: Stampede عرفنا أننا أمام أنيميشن ياباني مميز. لأن الأنيميشن الياباني له أسلوب مخصوص في الرسم بخطوط واضحة وجريئة وفيها اهتمام كبير بالتفاصيل مع استخدام أقل للمؤثرات الخاصة وتقنيات التحريك المعقدة. وهو ده اللي راعاه المخرج أتسوهيرو توميوكا أنه يقدم عمل متقن و(أصلي) في نفس الوقت.
الأداء الصوتي من فيليسيا انجيل و جوني يونج بوش كان مميز الى أقصى حد وبشكل عام المؤثرات الصوتية لعبت دور مهم علشان نشعر بالمزيد من المتعة أثناء المشاهدة.
لو كنت من محبي الأنيميشن اللي فيها ابهار وألوان وجرافيكس وتحريك بميزانية ضخمة ونجوم كبار يبقى One Piece: Stampede مش هايكون الأنيميشن المناسب لك. لكن لو بتدور على قصة مختلفة وأنيميشن ياباني مميز يبقى انت في المكان الصحيح.
