Ordinary Love : جاهزين للعياط؟!

لما نسمع عن ليام نيسون بيقوم ببطولة فيلم. كل اللي بييجي في بالنا أننا هانتفرج على فيلم أكشن. أو حتى فيلم كوميدي. لكن بالنسبة لفيلم Ordinary Love كانت مفاجأة لما عرفنا أن الفيلم تراجيدي.

Ordinary Love بيحكي عن زوج وزوجة بيعيشوا قصة حب جميلة. مع عشرة طويلة تمتد لسنوات. ثم بتكتشف الزوجة أنها مصابة بسرطان الثدي. ومن هنا بتبدأ القصة تاخد منحنى مختلف تماما سواء بالنسبة لها أو لقصة حبها وزواجها بشكل عام.

زي ما احنا شايفين قصة الفيلم مؤلمة.. وفيها دموع كتير.. لكن المخرجين جلين ليبيرن و  ليزا باروس ديسا قدروا يغلفوا الألم ده بصورة سينمائية جميلة وكادرات رائعة. وقصة حب رومانسية جميلة جدا. لكن كل ده لم يمنع دموعنا من النزول في بعض المشاهد.

الأداء التمثيلي لليام نيسون كان رائع. وواضح قوي احترامه لسنه وقدراته التمثيلية اللي واضح أنه عاوز يثبت لنا من خلالها أنه قادر على تجسيد أي شخصية تُطلب منه. لكن التمثيل الأروع كان للرائعة ليزلي مانفيل في دور (جوان) واللي قدرت مش بس تنقل لنا المعاناة الجسدية لمريض السرطان. لكن المعاناة النفسية كمان.

ممنوع مشاهدة Ordinary Love لمحبي الأفلام الكوميدية ومحبي المرح والتفاؤل. لكنه فيلم ممتاز لمحبي التراجيديا والأفلام الرومانسية الهادية.