Ouija : فيلم رعب متوسط القوة
فيلم ويجا من نوعية الافلام اللى التريلر بتاعها بيعطي ايحاء للمشاهدين انه بيقدم لهم اقوى فيلم رعب فى الموسم كله، لكن عند مشاهدة الفيلم بالكامل بنكتشف ان التريلر كان خادع جدا، وان الفيلم مش بيقدم اكتر من عدد كبير ومتوالى من مشاهد (الخض) اللى بتخلينا نقفز من الكرسى فى الدقايق الاولى للفيلم ثم نتحول لحالة كبيرة من الملل بعد كده لما جهازنا العصبى يتكيف مع احداث الفيلم.
من تأليف واخراج ستيلز وايت وبطولة اوليفيا كوك ودارين كاجسوف واخرين، بنشوف قصة مجموعة من الشباب اللى بيمارسوا لعبة الويجا، وللعلم فان لعبة الويجا لعبة حقيقية وبتتكون من لوحة ومؤشر بيمسكه مجموعة من الاشخاص، واللوحة مكتوب عليها حروف الابجدية كاملة وكلمتي yes و no ومع اتمام طقوس استدعاء الروح بيبدأ المؤشر في الحركة علي الحروف مكونة الكلمات.
اللوح السحري اثار ولازال بيثير ضجة بين رجال العلم والطب من ناحية ورجال السحر وامور ماوراء الطبيعة من ناحية تانية، فبينما رجال ما وراء الطبيعة بيأكدوا ان اللوح حقيقي واستدعاء الروح بيتم فعلا، بيتهمهم رجال العلم بالتخريف وان المؤشر بيتحرك بناء علي التاثير النفسي علي الافراد اللي ماسكينه.
نرجع للفيلم، زي ماقولنا الفيلم بيختصر الرعب في قدرة صناعه علي مفاجأة الجهاز العصبي للمشاهدين بمشاهد سريعة واصوات مرعبة بتحصل فجأة بعد السكون الأمر اللي بيعتبره المشاهدين الاصغر سنا او المراهقين رعب، لكن بالنسبة لنا بنعتبر ده جزء بسيط من اللي المفروض يحتويه فيلم الرعب الحقيقي.
طبعا بالحديث عن نوعية الفيلم كان لازم يكون للمؤثرات الصوتية والبصرية دور البطولة مع الابطال، بالاضافة للمشاهد المُصنعة بواسطة الكمبيوتر والجرافيكس، لكن المشاهد الاخيرة مكانتش بالقوة اللي كنا نتوقعها.
لو كانت فعلا المشاهد المفاجئة بترعبكم، ولو كنتم عاوزين تشوفوا اي فيلم رعب في الهالوين والسلام يبقي ننصحكم بمشاهدة فيلم (اويجا) ، اما لو كنتم من المشاهدين (التُقال) وبتعرفوا تقدروا قيمة افلام الرعب الحقيقية، ننصحكم بتوفير اموالكم ووقتكم لفيلم اكتر تاثيرا وارعابا.
