Ozzy : مغامرة متميزة لكلب ذكي!
من أجمل الأمور فى فيلم Ozzy إنه مش بس بيقدم حوالي ساعتين من الكوميديا، لكن كمان بيفكرنا بمجموعة من أحلي الأفلام اللى بتناقش السجون والحياة فيها، واللى شوفناها من فترات طويلة فاتت، ولم نكن نتوقع إن حد يفكرنا بيها وبشكل كوميدي كمان
Ozzy من إخراج ألبرتو روديريجز ومن بطولة الأداء الصوتي لـ جيلمورو روميروف و ميشيل جينر و كارلوس ارسيس و داني روفيرا.
الفيلم بيحكي عن الكلب (أوزي) اللى بيعيش حياة هادئة مع أسرة جميلة بتحبه، ووسط مجموعة من الحيوانات المرفهه اللى بتعيش مع ملاكها اللى بياخدوا بالهم منهم… لكن كل شىء فى حياة (أوزي) بيتحول لما بيضطر أصحابه لتركه فى ملجأ للحيوانات لإضطرارهم للسفر لليابان لمدة أسبوع.
أصحاب أوزي بيتركوه فى ملجأ غالي جدا إعتقادا منهم أن ده هايوفر له حياة كريمة خلال فترة الأسبوع، لكن أصحاب المكان بيضحكوا على البشر وبلقوا بالكلاب فى مكان أشبه بمعسكرات الأعتقال.. الأمر اللى بيحول حياة أوزي لجحيم، وبيضعه أمام تحدي صعب هو محاولة الهروب من السجن.
زي ما قولنا أفضل مافي القصة هو تشابهها مع أفلام الهروب من السجون زي The last castle أو The Shawshank Redemption، وكلها أفلام وقورة قدمت قصص إنسانية عظيمة، بالتالى تناولها فى فيلم كوميدي أنيميشن موجه للأطفال والكبار بيثير عندنا موجة ضخمة من الكوميديا الناتجة عن المقارنة.
الأداء الصوتي للأبطال كان متميز جدا، لكن البطولة الأولي والأخيرة هاتكون دائما من نصيب الألوان وكادرات التصوير وتحريك الشخصيات بسلاسة على الشاشة، وكلها أمور كانت رائعة وتنتمي لفئة السهل الممتنع، وقدر الإخراج يقدمها بشكل متميز ومحبب للعين.
مستوى الموسيقى التصويرية كان أقل من توقعاتنا بالنسبة لفيلم أنيميشن، وكنا منتظرين بعض الإستعراضات على سبيل المثال، لكن من الواضح أن الموسيقي كانت من أخر الأشياء اللى تم الأهتمام بها فى الفيلم.
Ozzy فيلم أنيميشن ممتع وجميل، ويناسب الكبار والصغار على حد سواء، لكن متعتكم بالفيلم هاتتضاعف لو كنتم من محبي ومتابعي أفلام الهروب من السجن والقصص الإنسانية فى السجون.
علشان تبقى عارف : مخرج الفيلم ألبرتو روديريجز قدم قبل كده فيلم Marshland سنة 2014 عن قاتل متسلسل بيرتكب مجموعة من الجرائم اللى بتحير رجال الشرطة.
