Padmaavat: أكشن ورومانسية ودراما هندية!

على الرغم من أن بعض الأفلام الهندية بتكون خفيفة وكوميدية أو بتحكي عن قصص مش بنفس أهمية أفلام تانيه، إلا أن الحقيقة أن الهند بقى لها فترة طويلة نسبيا بتقدم أفلام مهمة وقوية، مش بس على مستوى القصة والسيناريو والحوار، لكن على مستوى الصورة والكادرات والأخراج. تعالوا نتعرف أكتر على Padmaavat

القصة

Padmaavat بيحكي عن قصة حب بتنشأ بين حاكمين، الأول هو علاء الدين الخلجي والملكة راني بادمافاتي ملكة ميوار، وازاي بتتطور قصة الحب دي وايه العقبات والمشكلات اللي ممكن تواجه علاقة حب ملكية.

فريق العمل

الفيلم من اخراج المخرجة الهندية  سانجاي ليلا بهانسالي ومن تأليف  براكاش كاباديا ومن بطولة  شاهيد كابور و  ديبيكا بادوكان و رانفير سينج و أديتي راو هيداري و جيم ساربا و رازا مراد

الأداء التمثيلي

الأداء التمثيلي لأبطال الفيلم كان قوي، كمان من الواضح أن الفيلم كان بيتطلب جرأة كبيرة من طاقم العمل، والدليل حظر عرض الفيلم في ماليزيا بداعي أنه بيهين مشاعر المسلمين من خلال التعرض لقصة حياة الملكة راني بادمافاتي. مش كده بس. لكن في الهند أيضا حكمت 4 ولايات بعدم عرض الفيلم، ثم أمرت المحكمة العليا بضرورة عرض الفيلم في كافة الولايات الهندية وإلغاء الأحكام السابقة.

السيناريو والحوار والأخراج

سيناريو الفيلم قوي ومميز وغير ممل، وقدر ينقل لنا تفاصيل العلاقة الرومانسية بمنتهى البساطة والذكاء في نفس الوقت، لكن لا يمنع أننا كمشاهدين محتاجين بعض التركيز في الأسماء وخط سير السيناريو علشان لا نشعر بالتوهان في السيناريو، أما حوار الفيلم فكان عذب وجميل وسلس ورومانسي في نفس الوقت.

الديكورات والموسيقى والأزياء

من أروع الأمور اللي بنشوفها في الأفلام الهندية بشكل عام الاهتمام بالديكورات والموسيقى التصويرية الى اقصى حد، كمان تصميم وتكوين مشاهد الفيلم كان عبارة عن كرنفال من الألوان الحية والمريحة للعين والمثيرة للمشاعر، وده كان واحد من أقوى عوامل تميز الفيلم واللي بنحيي صناعه على قدرتهم على تقديم التجربة البصرية الغنية دي.

الخلاصة

Padmaavat فيلم هندي قوي ويستحق المشاهدة لمحبي الأفلام الرومانسية.

علشان تبقى عارف:

تقييم الفيلم على موقع IMDB 7.3 من 10