Pan : فانتازيا كلاسيكية متميزة
مش هانقدر ننسى شخصية (بيتر بان) الطفل المعجزة اللى بيقدر يطير، ومغامراته فى (نيفرلاند) وكل الاشياء الجميلة اللى شاهدناها فى صغرنا فى افلام الكارتون والانيميشن.. الفيلم اللى بيعرض فى 2015 بنعتبره استمرار لنجاح تقديم الشخصية دي فى السينما ونجاح القدرة على الابهار فى تقديم فيلم متميز ومناسب لكل افراد العيلة.
من اخراج جو رايت وبطولة أماندا سيفريد و رونى مارا و هيو جاكمان و جاريت هيدلوند بنشوف قصة بنعتبرها واحدة من اقدم كلاسيكيات القصص المقدمة وهي قصة (بيتر بان) الطفل اليتيم اللى بيعيش حياة صعبة فى الميتم اللى بيعيش فيه، خاصة مع ظروف الحرب العالمية الثانية والغارات المتكررة واللى بتجعل حياته جحيم، الى ان يستطيع مجموعة من القراصنة الخارقين للطبيعة خطفة فى مغامرة جريئة ومثيرة معقدة ولعبت المؤثرات الخاصة دور كبير جدا فيها.
القصة لم تغير الكثير فى القصة الاصلية لبيتر بان والى ابتكرها مؤلف مسرحي اسكتلندي هو جيمس ماثيو هاري فى اوائل القرن الماضي، وكانت بتحكي عن شخصية خيالية هى بيتر بان والقادر على الطيران واللى مش بيكبر ابدا وبيقوم بمغامرات كتير مع حوريات البحر والقراصنة او حتي مع الاطفال الضالة او lost boys واللى بيقودهم.
على صعيد الاداء التمثيلي.. اداء هيو جاكمان فى دور بلاك بيرد القرصان الشهير، وقدرته على المزج بين الشر والفكاهة فى نفس الوقت كان اكتر من متميز وقدر يعطي الشخصية زخم متميز وله نكهة جديدة، اما الطفل ليفي ميلر واللى قدم حوالى 6 افلام حتي الان يعتبر فيلمنا اليوم هو اقواهم واكثرهم تميزا، وبنعتقد ان هايكون له اثر كبير فى المستقبل لو استمر على السياسة التمثيلية وقدرته على اداء الشخصيات المسئول عنها.
بالنسبة للحوار، نعتقد انه لم يكن بنفس قوة باقى عناصر الفيلم، اما الموسيقي التصويرية والديكورات فكانت اكثر من مذهلة، ولما تناغمت مع المؤثرات الخاصة اللى خطفتنا من اللحظة الاولي وقدمت لنا تجربة مشاهدة جديدة ومتميزة عبر تقنية الـ3D واللى حسينا انها بالفعل حقيقية مش معمولة لزيادة ثمن التذكرة زي ما شوفنا مع افلام تانيه كتير.. كل التناغم ده ادي لتجربة سينمائية قوية وجميلة.
اخر معلومات عرفناها عن الفيلم هى ان الفيلم يعتبر ثاني تعاون سينمائي بين أماندا سايفريد وهيو جاكمان وان أدلي إكساركوبولس والممثلة لوبيتا نيونج كانوا مرشحتان لأداء شخصية تايجر ليلي لكن الدور راح فى النهاية لروتي مارا.. ومع استمرار عرض الفيلم فى السينمات العالمية والمصرية هانعرف كتير من المعلومات والكواليس اللى عارفين انها هاتكون مختلفة ومتميزة.. زي الفيلم.
