Papillon : هروب مبتكر من سجن غير عادي
على الرغم من مرور ما يزيد عن 45 سنة على انتاج فيلم Papillon في نسخته الأولى، واللي قام ببطولتها اتنين من عظماء السينما أيامها – وحتى اليوم – وهم ستيف ماكوين و داستن هوفمان. الفيلم نجاح نجاح كبير جدا وحقق ما يزيد عن 53 مليون دولار حتى اليوم.
ويمكن أهم سؤال كنا بنسأله لنفسنا قبل مشاهدة الفيلم. هل هايقدر فريق عمل الفيلم الحالي مواجهة أسماء بحجم ستيف ماكوين وداستن هوفمان؟
في البداية Papillon بيحكي عن هنري اللي بيقوم بدوره (تشارلي هونام) واللي بيتم اتهامه بجريمة قتل لم يرتكبها، وبيتم ارساله لسجن، عبارة عن مستعمرة كاملة بتضم مجموعة من أشرس وأسوأ المجرمين. واللي بيتم ارتكاب سلاسل من التجاوزات فيها طوال الوقت. لكن هنري بيتعرف على (ديجاس) – وقام بالدور رامي مالك- واللي بيشكل مع رفيقه ثنائي بيخطط للهرب من واحد من أكثر السجون قسوة في العالم.
تشارلي هونام مش بيقدم أعمال كتير، لكن الأدوار اللي بيقوم بيها مؤثرة وقوية. نفتكر منها دور الملك أرثر في فيلم King Arthur: Legend of the Sword ودوره في سلسلة أفلام Pacific Rim وغيرها من الأدوار القوية.
لكن كان من الغريب أن المخرج مايكل نوير يدخل مغامرة ورهان على إسم فيلم كبير مع هونام، خاصة أن اللي بيشاركه البطولة رامي مالك، وهو امريكي من اصل مصري معروف ببطولته لمسلسل Mr.Robot وعلى الرغم من بطولته مؤخرا Bohemian Rhapsody واللي حقق نجاح نقدي وفني كبير، إلا أن الدخول بالبطلين دول في عمل بالقيمة دي كان مغامرة. وأثبتت المغامرة نجاحها.
من الأمور المميزة في الفيلم إخراج مشاهد الأكشن، لكن بعض المشاهدين ممكن يشوفو الفيلم دموي بشكل أزيد من اللازم شوية. لكن على كل الأحوال الفيلم قدم صورة قاتمة لكن ممتعة ومميزة، وقدم تصور مختلف لفكرة السجن بشكل عام. وساعدت كادرات الفيلم والتلاعب بالإضاءة على توفير الجو المطلوب علشان يخرج الفيلم في النهاية بصورة جيدة.
لكن الملاحظة الأخيرة عندنا هي أن الفيلم مش جيد مقارنة بنسخة 1973، ودي ملاحظة بدأنا نشوفها في كتير من الأفلام اللي تعتبر اعادة اصدار أو تقديم لأفلام قديمة. لكن لو المشاهدين هايشوفوا الفيلم بشكل منفصل عن العمل الاصلي ممكن يعجبهم ويجدوا فيه فيلم قوي ومميز.
