Patriots Day : إزاي الشعوب بتتكاتف فى الأزمات.
فى 15 أبريل 2013 وأثناء ماراثون للجري فى ولاية بوسطن الأمريكية، قام مجموعة من الإرهابيين بتفجيرين أسقطوا عدد كبير من القتلى، وعدد أكبر من الجرحى، وتركوا المكان فى حالة من الهلع، وهربوا مع استغلال الزحام والتدافع.
فيلم Patriots Day بيحاول يرصد مجهودات الشرطة والمباحث الفيدرالية، لمحاولة ظبط الجناة، وتضافر أهل المدينة معهم علشان يوصلوا للى حول يوم أحتفالهم لكارثة ضخمة.. وطبعا غني عن الذكر أن الأحداث مقتبسة عن قصة حقيقية.
الفيلم من إخراج بيتر بيرج وبطولة مارك ويلبرج و ميشيل موناجان و جي كيه سيمونز و جون جودمان، واللى قدروا يقدموا أداء تمثيلي متميز وقادر على إعادة تقديم الأحداث الحقيقية بشكل مثير ومتسارع.
بنلوم على الفيلم البطء الشديد فى السيناريو فى الربع الأول من الأحداث… وعلى الرغم من استغلال الفيلم للمساحة الزمنية علشان يسرد لنا الخلفية الإجتماعية والنفسية وراء كل واحد من الأبطال لكننا لم نشعر بأهمية النقطة دي لما بدأت الشخصيات تتفاعل مع بعضها فى الربع الأخير من الأحداث. تطويل السيناريو كان بلا قيمة من وجهة نظرنا.
كان من الواضح إختلاط الفهم عند القائمين على الفيلم بخصوص الدين الإسلامي وحتي اللغة العربية اللى بتظهر مكتوبة بشكل معكوس على القنوات اللى المفروض بتنقل أحداث بوسطن، ودي سقطة إخراجية واستسهال سىء من صناع الفيلم.
من إيجابيات الفيلم إن مانقدرش نقول إن له بطل واحد، بل على العكس حسينا إن كل ممثل بيؤدي بالظبط المطلوب منه وبيتكامل مع باقى الممثلين لصنع منظومة قوية، حتي مارك والبرج على الرغم من قوة إسمه مانقدرش نقول إنه شال الفيلم لوحده من الألف للياء.
على الرغم من الملل اللى شعرنا بيه فى بداية الأحداث، لكن التسارع فى السيناريو بالقرب من النهاية كان ممتع وشيق جدا، خاصة عرض مشاهد حقيقية فى نهاية الأحداث بشكل أجبرنا على المقارنة بين الممثلين والشخصيات الحقيقية، وده عامل مهم من عوامل نجاح الفيلم وجذبه للجمهور.
Patriots Day مش مجرد فيلم بيستعرض القدرات الخاصة لقوات الشرطة والجيش الأمريكية، لكنه بيستعرض أيضا قدرة الشعب على التوحد والتماسك فى ظل الظروف الصعبة والأزمات الضخمة.
علشان تبقى عارف:
الفيلم يعتبر التعاون الثالث بين (مارك والبرج) و(جون جودمان) بعد فيلميهما معًا: (Transformers: Age of Extinction) و(The Gambler) عام 2014.
