Peppermint: تيمة الانتقام في فيلم سينما جديد
تيمة الأنتقام هي واحدة من أشهر وأقوى تيمات صناعة الأفلام في هوليود. والحقيقة أنها واحدة من التيمات المهمة اللي بتستفز المشاهدين علشان يشوفوا الأفلام اللي بتناقش عمليات الأنتقام، وهي دي التيمة الأساسية اللي بيناقشها فيلم Peppermint
Peppermint بيحكي عن أم بتفقد طفلتها وزوجها في حادث أليم، ثم بتعرف من تحقيقات الشرطة أن الجناة تابعين لمنظمة أجرامية أياديها منتشرة في كل مكان، وبتعرف أنها مش هاتقدر تاخد حق أو باطل من الجناة لو اتبعت الطرق التقليدية في التقاضي. علشان كده بتقرر تاخد حقها بإيدها وتطبق العدالة بالشكل اللي شايفاه صحيح ومناسب. هل هاتعرف تعمل ده؟
من أجمل الأمور في الفيلم الأداء التمثيلي للبطلة جينفر جارنر، والحقيقة أن جارنر نجحت في توصيل مشاعرها لنا على كافة التحركات الدرامية على مدار أحداث الفيلم، وقدرت تقنعنا أنها تحولت – بفعل اللي حصل لها – من إنسانة وديعة عاوزه تعيش حياتها في سلام إلى إنسانة شرسة بتسعى للأنتقام بكل طريقة ممكنة.
إخراج بيير موريل لمشاهد الأكشن كان متميز جدا، وقدر يقدم مشاهد قوية ومقنعة لنا كمشاهدين، كمان قصة تشاد ست جون كانت مقنعة وقدمت تفسيرات درامية لكل الأسئلة اللي ممكن تخطر في بال المشاهد بحيث لا يتحول الفيلم لمجموعة من الأحداث الغير مترابطة أو منطقية.
الديكورات واختيار أماكن التصوير كانت جيدة، لكن الإضاءة كانت مظلمة في بعض المشاهد وده جعلنا نشعر ببعض الضيق لكنه لم يؤثر على تجربة مشاهدتنا بشكل عام.
Peppermint فيلم أكشن جيد قائم على تيمة الأنتقام بننصح بمشاهدته لمحبي أفلام الجريمة والانتقام.
علشان تبقى عارف: تم عرض الفيلم في بداية سبتمبر ٢٠١٨ في الولايات المتحدة الأمريكية.
