Pet Sematary : تعمل ايه لو تقدر ترجع الناس من الموت؟

لما بنفقد شخص عزيز علينا بيكون عندنا إحساس إننا لو نقدر نرجع الشخص ده تاني للحياة. دي ممكن تكون أفضل حاجه حصلت لنا. لكن الحقيقة إن العودة من الموت مش دايما بترجع الشخص زي ما كان. أو على الأقل هي دي الرسالة اللي بيحاول الكاتب ستيفن كينج (اللي تم اقتباس الفيلم عن روايته) إنه يوصلها لنا.

Pet Sematary بيحكي عن طبيب بينتقل مع أسرته لمنزل ريفي بجانب مقبرة غامضة. وبيكتشف مع الوقت أن المقبرة لها قدرة سحرية على إعادة أي حاجه تدفن فيها للحياة. لكن لما بيجرب الدكتور يدفن قط في المقبرة. بتعود من جديد للحياة لكن بشكل مرعب جدا.

الفيلم من إخراج كيفين كلوش وبطولة جايسون كلارك و جون ليثجو و آيمي سايمتز لكن البطولة الأساسية في الفيلم هي للمؤلف الأصلي ستيفن كينج واللي تم اقتباس الفيلم عن روايته. وكينج هو واحد من أشهر الأقلام اللي كتبت أفلام وأعمال مرعبة. ومجرد وجود أسمه على عمل كفيل بضمان مستوى معين من الرعب لا يمكن النقص عنه.

واللي حسبناه لقيناه. تصميم كينج للرعب في الفيلم كان قائم على الرعب النفسي. على عمل شعور في نفس المشاهدين بإن فيه حاجه غلط ومريبة ومرعبة بتحصل. بدون التركيز على تصميم المشاهد المرعبة أو اللي بتخلي المشاهد يقفز من الرعب. وهي الحاجه اللي بنشوفها في كل أفلام الرعب تقريبا في الفترة الأخيرة.

لكن الكتابة الجيدة مكانتش هاتفرق لو كان الأداء التمثيلي ضعيف. وفي الحالة دي شوفنا أداء تمثيلي جيد من كل ابطال الفيلم تقريبا. لكن بناخد على الفيلم عدم الاهتمام بتقديم خلفيات نفسية ممتدة للأبطال علشان نكون أكثر تعاطفا وانجذابا للمواقف اللي بتحصل لهم.

بنرشح Pet Sematary للمشاهدة من محبي أفلام الرعب بشكل عام وعشاق ستيفن كينج بشكل أكثر خصوصية.