Pete’s Dragon : المغامرة أحلي ما فى الفيلم
على الرغم من إن إعادة تقديم الأفلام الهوليودية القديمة بيعطي القدرة للمشاهدين إنهم يشاهدوا أفلامهم المفضلة بتقنيات حديثة وممثلين جُداد ودمهم لسه طازج، إلا إن طوفان الإفلام المعاد إنتاجها مؤخراً بتتصف ببعض من الإستعجال وثقل الدم… نقدر نعتبر Pete’s Dragon إستثناء للقاعدة دي!
من إخراج وتأليف ديفيد لوري وبطولة اويكس فيجلي و اونا لورانس و روبرت ريدفورد، بنشوف قصة طفل صغير بيهرب من عائلة بتتبناه بسبب سوء معاملتهم له وبيقدر يتصاحب على تنين! الجملة صحيحة فعلا إحنا مش غلطانين… الطفل اليتيم الصغير بيتصاحب على تنين وبيصحبه فى مجموعة لا تنتهي من المغامرات والمطاردات فى عالم لا يُصدق صنعته ديزني بقدراتها الكمبيوتريه المتميزة، وخبراتها الجرافيكيه اللى بتبهرنا دايماً.
كعادة أفلام ديزني الفيلم بيمر بمجموعه مراحل من التطورات فى الأحداث بيصاحبها تطورات فى السيناريو والحوار وطبعاً الإضاءة والموسيقي وزوايا التصوير واللى كلها كانت متميزة وكانت مصنوعة بدقة، وإن كانت بعض المشاهد شعرنا فيها إنها مصنوعة مخصوص علشان لأبهار المشاهدين فى تقنيات البعد الثالث 3D وده مش عيب فى حد ذاته لكنه مش بيبهر العين المعتادة على المشاهدة بالبعد الثالث.
الموسيقي التصويرية كانت متميزة ومتماشيه مع المشاهد بشكل رائع، التحريك كمان والمؤثرات الخاصة لعبت دور مهم علشان الفيلم يظهر بالشكل النهائى اللى ظهر عليه، ونعتقد أنه لولا موسم العيد الفيلم كان ممكن يحظي بمزيد من الإهتمام بس دايماً المغامرات الصادقة بتضيع أمام أفلامنا العربية المبتذلة وطرق طرحنا لقصص أفلامنا الركيكة.. على الأقل فى موسم العيد.
مستنيين رأيكم عن الفيلم فى التعليقات.
