Phantom Thread: رحلة مختلفة في عالم الموضة والأزياء

على الرغم من أن عالم الموضة والأزياء ممكن الكثير من الناس تتخيل أن اللي بيشتغلوا فيها بتكون حياتهم بوهيمية وكلها جنون، لكن الحقيقة أن المجال ده من أصعب مجالات العمل في العالم، وبيتطلب العمل فيه جزء كبير من بذل الوقت والمجهود والتركيز الشديد والأهتمام بالتفاصيل. وعن كل الأمور دي بيحكي فيلم Phantom Thread .. تعالوا نتكلم عنه.

القصة

Phantom Thread بيحكي عن قصة نجاح أحد الأشخاص العاملين في عالم الموضة والملابس والأزياء، وازاي بيقدر يوصل لأعلى المكانات في العالم ده، لكن مع وجوده على القمة، بيقع في الحب وبيصبح له عشيقة، الأمر اللي بيعطله عن عمله وبيصيبه بالتشتت وعدم القدرة على العمل بنفس الشغف. هل ها يقدر يختار بين الحب وبين الشغل؟

فريق العمل

الفيلم من تأليف وإخراج بول توماس أندرسون ومن بطولة دانيال داي لويس و فيكي كريبس و كاميلا روثرفورد و ليزلي مانفيل و جين بيرى و بيرن كولاكو

الأداء التمثيلي

الأداء التمثيلي لكل الأبطال كان جيد ومميز، والأخراج قدر يبرز النقط الجيدة في الأداء التمثيلي ويركز عليها زي حركة العيون والوقفات أثناء الكلام وطريقة نطق الجمل الحوارية، والحقيقة أن كل تفصيله من تفاصيل الأداء التمثيلي تم الاهتمام بها الى اقصى حد وده من أهم عوامل نجاح الفيلم من وجهة نظرنا.

السيناريو والحوار والأخراج

على الرغم من قوة سيناريو الفيلم لكن البعض ممكن يشعر بالملل بسبب بطء وتيرة الأحداث، لكن بشكل عام نقدر نقول أن الفيلم كان بيركز بالمقام الأول على التفاصيل الصغيرة في نظرات العيون وحركة الكاميرا وتصميم المشهد، على حساب سرعة حركة السيناريو والانتقال بين المشاهد.

الديكورات والموسيقى والأزياء

ديكورات الفيلم كانت متقنة ونقلتنا زمنيا للفترة اللي بيتناولها الفيلم، كمان الموسيقى التصويرية وحركة الكاميرا كانت متقنة وموظفة بشكل ممتاز مع كل مشهد من مشاهد الفيلم.

الخلاصة

فيلم Phantom Thread يستحق المشاهدة من أصحاب البال الرايق ومحبي السينما والأفلام اللي بتخاطب العين والوجدان والمشاعر.

علشان تبقى عارف:

تقييم الفيلم على IMDB 7.9 من 10