Pitch Perfect 3: خلطة مثالية لمحبي الاستعراض
محبي أفلام الاستعراضات والأغاني والرقص والموسيقى المستمرة هايلاقوا في الجزء الجديد من Pitch Perfect كل اللي بيدوروا عليه، ده كان المتوقع من الفيلم وصناعه، لكن الجديد كان قدرتهم على إضافة جانب انساني ومشاهد قوية تستحق المشاهدة غير مشاهد الاستعراض، وده من أفضل الأمور اللي عجبتنا في Pitch Perfect اللي هانتكلم عنه بالتفصيل في السطور القادمة.
القصة
على الرغم من أنفصالهم بعد حصولهم على بطولة العالم، فريق الفتيات اللي أمتعنا في الأجزاء السابقة من الفيلم باستعراضاتهم، بيعود للتوحد من جديد للمشاركة في مسابقة جديدة، لكن المرة دي ضد فريق قوي ومميز، مش بس في الغناء لكن في الاستعراض والعزف والرقص.. هل هايقدروا ينجحوا المرة دي؟
فريق العمل
الفيلم من اخراج تيريش سي وتأليف كاي كانون وبطولة ريبيل ويلسون و آنا كامب و روبي روز و بريتاني سنو و إليزابيث بانكس و ألكسيس ناب
الأداء التمثيلي
المميز في الأداء التمثيلي لبطلات الفيلم، هو قدرة كل واحدة فيهم على ادراك المطلوب منها على صعيد التمثيل، بحيث قدرت كل بطلة من البطلات تنقل لنا شعورها مش بس كنجمة استعراض لكن كإنسانة ليها مشاعر وأحاسيس. وده من أفضل الأمور اللي أثارت انتباهنا واعجابنا بخصوص الفيلم.
السيناريو والحوار والأخراج
سيناريو الفيلم كان سهل الفهم والمتابعة، وقدر يتنقل بينا في المشاهد والأحداث المختلفة بسهولة وده شيء يحسب له، أما حوار الفيلم فكان عليه أنه يكون كوميدي وخفيف معظم الوقت وبرضو نجح الحوار في كسر ملل بعض المشاهدين اللي يمكن مش عاوزين يتفرجوا على كمية كبيرة من الاستعراضات والرقصات.
الديكورات والموسيقى والأزياء
طبعا لما بنتكلم عن فيلم قوامه الأساسي الاستعراض والغناء، لازم تكون ديكوراته وموسيقاه التصويرية جيدة جدا، بالإضافة لتصميم الأزياء واختياراتها، وطبعا الديكورات اللي لعبت دور مهم علشان نشعر بكل تفصيله في الفيلم ونتذوقها بشكل مميز
الخلاصة
Pitch Perfect 3 فيلم استعراضي غنائي جميل مع لمحة درامية وبعض الكوميديا.. يعتبر خلطة مثالية لكل محبي الأفلام الاستعراضيه
علشان تبقى عارف:
تقييم الفيلم على IMDB 6.3 من 10
