Pitch Perfect2 : التكرار غلب الابهار!
الحقيقة اللى لازم نعترف بيها لأنفسنا وليكم. اننا كنا متوقعين معظم احداث الفيلم بمجرد معرفة اسمة ومشاهدة (التريلر) الخاص بالفيلم. لكن هل توقعاتنا كلها كانت فى محلها؟
للأسف أه ! وعلى الرغم من فرحتنا الشخصية بقدرتنا على استنتاج الاحداث الا اننا كنا نتمني يكون الفيلم فيه بعض التجديد لعدم الملل ليس الا.
من اخراج اليزابث بانكس وتأليف كاي كانون بنشوف مغامرة جديدة لفتيات الاستعراض، فى محاولة الفوز بمسابقة دولية جديدة ومختلفة من نوعها.
طبعا احنا عارفين كويس ان السيناريو والقصة فى النوعية دي من الافلام مجرد حجة لتمرير عدد من الرقصات والاستعراضات، وعلشان نكون بننتصر للحق، لازم نقول ان الفيلم كان مبهر فيما يتعلق بالاستعراضات وتنظيمها، والرقصات وجمالها وقدرة الاخراج على توظيف عناصر الاضاءة والديكور وتفاصيل الفيلم بالكامل لخدمة الاستعراضات.
الكوميديا فى الفيلم كانت حاضرة وبشدة، من خلال تعليقات ريبل ويلسون او (فات ايمي) واللى كان لها دور جميل –وقصير- فى فيلم الكوميديا Night at the Museum فى جزئه الأخير. لكن فى راينا انها لو اعتمدت فى نجاحها على المواقف الكوميدية اللى بتحصل نتيجة حجمها الكبير ووزنها الزائد، مش هاتكمل كتير فى هوليود وها تتحرق ككوميديانه رغم ان مش ده المصير اللى نتمناه لها.
الكلام عن الموسيقي التصويرية والديكور هايكون اكيد لصالح الفيلم اللى اهتم – زى ما قولنا – بالجزء الاستعراضى فى الفيلم، وبالتاكيد الديكورات جزء لا يتجزأ من الاستعراض وجائت الديكورات بشكل مبهر ومتميز، وخصوصا ديكورات الخلفية فى مسارح الاستعراضات اللى جائت بالكامل اكثر من ممتازه.
Pitch Perfect2 بيقدم كل اللى بيبحث عنه محبى الجزء الاول.. استعراضات كبيرة ومواقف كوميدية و.. الخ لكن هل بيحاول يقدم اى جديد عن الجزء الاول؟ منتظرين اجابتكم فى التعليقات لو شوفتم الفيلم
