Play or Die: لو ده اللعب.. الجد يبقى ازاي؟!
الجميل في الأفلام المقتبسة عن روايات أن بيكون عندك اصل تقدر تقارن بيه. بس على قدر ما الموضوع ده جميل، على قدر ما بيحط عبء على صناع الفيلم انهم يقدموا فيلم قوي بنفس قوة الرواية.
فيلم Play or Die المقتبس عن رواية Puzzle بيحكي عن مجموعة من الأصدقاء بيتفقوا على لعبة هروب من مكان مغلق. لعبة بدأت تنتشر في مصر مؤخرا لكن المرة دي ها تتلعب بشكل حقيقي.. والغلطة فيها معناها الموت!
في طريق خروج ابطالنا من الغرف المغلقة والأفخاخ المعدة لهم بنبدأ نعرف أكتر عنهم. لكن للأسف السيناريو مش بيسيبنا نعرف كتير عن الابطال غير لوكاس وكلوي (قام بالأدوار تشارلي بالمر روثويل و روكسان مسكيدا) أما باقي الأبطال فا مش بيكون عندهم وقت علشان نعرف أي قصص سابقة عنهم وبالتالي مش بنحس بتعاطف كتير معاهم.
اخراج الخدع وتصميمها كان جيد، كمان استخدام الإضاءة الخافتة والألوان الباردة عموما أضاف للفيلم، لكن من ناحية تانيه تصميم المشاهد وسيناريو الفيلم بشكل عام كان مكرر وفيه كليشيهات كتير أصبحت محفوظة من كل أفلام الرعب المشهورة تقريبا وده خلانا نحس بالملل من بعض الاحداث اللي كنا قادرين نتوقع ازاي هاتمشي.
في نهاية الفيلم بنشوف Twist مهم ومثير. مش هانقدر نحرقه عليكم طبعا لكن يعتبر ده من عوامل قوة الفيلم لانها كانت المرة الوحيدة تقريبا اللي صناع الفيلم يفكروا بره الصندوق ويقدموا حاجه من بنات أفكارهم.
Play or Die مش افضل فيلم رعب شوفناه مؤخرا لكنه فيلم بمستوى مقبول لو كنتم من محبي النوعية دي من الأفلام.
