Playing with Fire : اللعب بالنار مش حلو!
زمان واحنا صغيرين أهلنا حذرونا من اللعب بالنار. لكن واضح أن صناع فيلم Playing with Fire مكانوش بيسمعوا الكلام!
Playing with Fire بيحكي عن مجموعة من فرق الأنقاذ ومكافحة الحرائق. مهنتهم صعبة وشاقة ومحتاجه قوة وتركيز. لكن الأمور بتفلت منهم لما بيكون لازم عليهم يحموا مجموعة من الأطفال والمراهقين.
مفهوم طبعا أن الكوميديا في الفيلم قائمة على التناقض بين شخصية رجال الأطفاء الجادة وبين مهمتهم والمواقف الكوميدية اللي بتنتج عنها. ويمكن من هنا كان اختيار “جون سينا” المصارع الشهير في دور البطولة علشان بنيته الجسدية وملامحه الجادة. لكن من ناحية تانيه جون سينا مش عارف يقدم الجزء الكوميدي من الشخصية بشكل جيد. وده حسينا بيه من أول مشهد لنهاية الفيلم.
لكن من ناحية تانيه الطفل كريستيان كونفيري بيقدم أداء جيد في شخصية ويل و فينلي سلاتر في دور زوي. الاتنين قدروا يقدموا أدوار جيدة جدا ومش متناسبة مع أعمارهم وبنتوقع أن يكون لهم موهبة كبيرة في المستقبل.
أمال المشكلة كانت في ايه؟ المشكلة كانت في سيناريو الفيلم اللي واخد الطريقة “الأمنة” علشان يقدم كوميديا تقليدية. بدون ما يجرب يقدم مواقف جديدة أو حتى ايفيهات مختلفة علشان يعمل كوميديا من بره الصندوق. الفيلم كله يعتبر من الأفلام الكوميدية التقليدية.
لكن نقطة ضعف الفيلم ممكن تكون نقطة قوته في نفس الوقت. لو انت بتدور على فيلم تقليدي تقضي قدامه وقت لطيف، خاصة لو معاك أطفال صغيرة في الحالة دي Playing with Fire هايكون فيلم مناسب جدا خاصة في خروجات الويك اند اللي بنبقى عاوزين نقضيها بأقل مخاطرة ممكنة.
