Pokémon Detective Pikachu : عالم البوكيمون بشكل مختلف تماما
لما نتفرج على فيلم من أفلام البوكيمون لازم نفهم أنه موجه بالأساس للفئات الأصغر سنا زي الأطفال والشباب في بداية سن المراهقة. لكن فيلم Pokémon Detective Pikachu بيحاول يزود شريحة مشاهديه خارج الفئة العمرية دي. هل هاينجح في ده؟
Pokémon Detective Pikachu بيحكي عن جاستس سميث أو تيم اللي بيدور على والده المختفي، وبيساعده في البحث واحد من شخصيات البوكيمون اللي هو (المحقق بيكاتشو) واللي قام بالأداء الصوتي لشخصيته ريان رينولدز.
على الرغم من أن الحبكة تبدو بسيطة ومكررة لكن طريقة تنفيذها على الشاشة كانت جميلة ومبتكرة، خاصة أنها أول مرة تقريبا يتم تقديم شخصيات البوكيمون بشخصيات حقيقية مع بعض الخدع في الجرافيك طبعا، بالإضافة لمحاولة الفيلم طوال الوقت أنه يمد جسر بين متابعي سلاسل وشخصيات البوكيمون وبين ضيوف الفيلم اللي بيشوفوه للمرة الأولى بحيث لا يخسر كلا المتابعين.
الميزة المهمة كمان في الفيلم انه بيجمع النمط التقليدي لشخصيات وأفلام البوكيمون وبين فكرة المحقق اللي عاوز يوصل للحقيقة من خلال جمع الأدلة. وهي حبكة بتفكرنا بحبكة أفلام شيرلوك هولمز. ومن هنا بيجي أهمية الأداء الصوتي والتمثيلي للأبطال علشان يخدم الحبكة. لكن بشكل عام حسينا بألفة واهتمام بشخصيات البوكيمون اكتر من الشخصيات الحقيقية اللي ظهرت في الفيلم. والأداء الصوتي لريان رينولدز كان أكتر من رائع وكان عارف كل أبعاد الشخصية اللي بيقدمها بشكل جيد.
Pokémon Detective Pikachu من أفلام البوكيمون الجميلة واللي هاتقدر تحقق شهرة. لكن هل هاتقدر تكون جمهور جديد للعالم ده؟ ولا هايفضل محبي البوكيمون بس هم اللي بيقطعوا التذكرة ويدخلوا الفيلم؟ شاركونا رأيكم.
