Poltergeist : تيمة مكررة ورعب ممل
الترجمة الحرفية لكلمة Poltergeist تعني “الأرواح الشريرة” لكن بيتم الرمز بيها للأشباح اللى بتعمل صخب وضجيج فى المكان اللى بتبقى موجوده فيه، كنوع من انواع اثبات الوجود وبث الرعب فى نفوس البشر الموجودين فى نفس مكان تواجدها. ودي الفكرة الاساسية اللى اعتمد عليها الفيلم.
اقتباسا عن فيلم بيحمل نفس الاسم وسبق تقديمه فى 1982 وحقق نجاح كبير. المخرج جيل كينان كان متوقع انه باعادة اصدار الفيلم من جديد وتقديمه ممكن يحقق نفس النجاح . لكن الحقيقة فى راينا ان الفيلم لم يحقق نصف او حتي ربع النجاح اللى حققته النسخة السابقة.
من بطولة سام روكويل و روزماري دويت وساكسون شاربينو بنشوف قصة اسرة بتنتقل حديثاً لمنزل جديد، لكن اطفالهم بيبدأوا فى معاصرة احداث صعبة من خلال سيطرة مجموعة من “الاشباح الصاخبة” على المنزل، الامر اللى بيجعل العائلة تلجأ لمجموعة من المتخصيين فى علوم ما وراء الطبيعة .
السؤال اللى بيطرح نفسه : هل على الرغم من تدني مستوي الفيلم الفني، وتكرار القصة واقتباسها من عدة تيمات لأفلام رعب سابقة، هل الفيلم هايفشل فى مصر؟ فى اعتقادنا ان الاجابة هى لا، والدليل هو تخصيص اكثر من قاعة له لما روحنا نشوف الفيلم فى سينما (سيتي ستارز)، والعدد الضخم من الشباب المراهق اللى كان بيتسابق للحصول على تذكرة خصوصا ان عرض الفيلم فى مصر تزامن مع موسم الاجازات.
عرض الفيلم بتقنية ثلاثية الابعاد 3D كان من اكثر الاشياء اللى حرقت دمنا بخصوص الفيلم. لان المخرج لم يستغل التقنيات الكبيرة اللى بتعطيها له الـ3Dلتوليد اى اسلوب رعب جديد او مختلف وحسينا ان العرض الثلاثي الابعاد كان كل الغرض منه زيادة سعر التذكرة مش اكتر. لكن الشباب اللى كان قاعد معانا فى السينما كانوا فرحانين جدا وحاسين برعب حقيقي.. رعب لم نشعر احنا او اى مشاهد قديم للسينما بأى جزء منه. وشعرنا بالشفقة على جيل كامل مش هايعرف عن الرعب اكتر من مجرد مشاهد الـ(خضه) والمباغته للجهاز العصبي!
الموسيقي التصويرية للفيلم كانت ضعيفة زيها زي الديكورات والاحداث والاخراج والتمثيل، وباقى عناصر الفيلم. وعلشان ما نكونش ظالمين. نقدر نقول ان الناس اللى بتحب المشاهد المفاجئة واسلوب (الخض) فى الرعب ممكن يلاقوا الفيلم كويس. لكن لو كنتم زينا من محبى الرعب المطبوخ على نار هادئة.. الفيلم هايكون ممل ومستهلك ومكرر بالنسبه لكم.
Poltergeist تجربة سينمائية سيئة مش بنرشحها لاي حد بيفهم فيما يتعلق بافلام الرعب. او حتي الافلام العادية. انتظروا عرضه فى القنوات الفضائية وخلاص!
