Rabbit School Guardians of the Golden Egg : مغامرة شقية لحماية البيضة الذهبية!
يوم بعد يوم بنعرف أن هوليود مش محتكرة إنتاج الأفلام القوية فحسب، بل كتير من الدول التانية بتنتج أفلام كويسه جدا وقادرة على المنافسة، لكن الأضواء مش بيتم تسليطها على الأفلام دي بالقدر الكافي، علشان البروباجندا الأمريكية بتقوم بالازم طبعا. وفيلم Rabbit School Guardians of the Golden Egg من الأفلام الألمانية اللي تستحق الاهتمام بيها وتسليط الضوء عليها.
القصة
الفيلم بيحكي عن أرنب شقي اسمه ماكس، بيجد نفسه فجأة في مدرسة قديمة، ها يتعلم فيها بمساعدة الأرنبة أيمي المهارات الخاصة بأرنب عيد الفصح، وكل ده علشان يتصدى لعائلة من الذئاب، واللي بتهدد البيضة الذهبية اللي المفروض يحميها!
فريق العمل
أسماء فريق العمل صعبة شويه علشان ألمان.. والفيلم من إخراج إيت فون مونشاو-بوهل ومن تأليف كاتيا جروبل و داجمار راهبيندر أما الأداء الصوتي لأدوار البطولة فكان من نصيب جيني ميلينا ويتز و سينتا بيرجر و فردريك فون ثيون و ماكس بوجوث
الألوان والتحريك
من أكتر الأمور اللي بنهتم بيها لما نتكلم عن فيلم أنيميشن بتكون التحريك، والمقصود به طريقة تحرك الشخصيات على الشاشة، ومدى انسيابها واحترافيتها في نفس الوقت، والحقيقة أن الفيلم قدر يحقق المعادلة الصعبة بين التحريك السريع للشخصيات وفى نفس الوقت قدر ما يعملش تشتيت لعين المشاهد. أما الألوان فكانت كرنفال حقيقي، وألوان ثرية جدا شوفناها على الشاشة ودرجات مذهلة ومتنوعة من الألوان جعلت الفيلم بالكامل لوحة فنية جميلة، ونقدر نقول أن الألوان واختلافها وتنوعها كانوا افضل ما في الفيلم.
الموسيقى والإخراج
موسيقى الفيلم كانت جميلة وراقية، لكن لم تكن عنصر من عناصر جذبنا وحثنا على المتابعة. وحسينا إنها لم تترك أثر في أذاننا بعد مشاهدة الفيلم، على الرغم من كونها موسيقى جميلة بحد ذاتها، لكن قوتها واستخدامها في الفيلم لم يكونوا بنفس قوة واستخدام الألوان والإبهار في العرض وباقى العوامل اللي بنحكم على الفيلم على أساسها.
أما إخراج الفيلم فلازم نشهد له بالكفاءة والقوة، والقدرة على ابهار المشاهدين واسعادهم سواء كانوا كبار أو صغار.
الخلاصة
نتمنى السينمات المصرية تتيح لنا فرص أكبر على الاحتكاك ومشاهدة أفلام من دول وثقافات مختلفة غير هوليود. وإن ده يكون بشكل أوسع ومش مقصور على سينمات محددة زي سينما زاوية.
علشان تبقى عارف: تقييم الفيلم على موقع IMDB 7.3 من 10
