Rambo 5: Last Blood : رسالة رامبو الأخيرة للعالم
لو كنت من مواليد أواخر السبعينات أو الثمانينات أو حتى أوائل التسعينات. في الغالب هاتكون اشتريت جزء واحد على الأقل من أجزاء سلسلة رامبو على شريط فيديو وقضيت ليلة من الأكشن الجميل والمميز اللي أشتهر بتقديمه سيلفستر ستالون.
في Rambo 5: Last Blood رامبو (سيلفستر ستالون) بيقدم رسالته الأخيرة.. العمل الأخير اللي بيختم بيه واحدة من أطول سلاسل أفلام الأكشن في العالم (١٩٨٥-٢٠١٩) وكان واضح اهتمام سيلفستر بالفيلم بدرجة كبيرة حتى أنه بيقال أنه شارك في كتابة السيناريو بنفسه.
Rambo 5: Last Blood بيحكي عن رامبو اللي بيقرر يعيش اللي باقي من حياته في ولاية أريزونا. لكنه بيلاقي نفسه مضطر لمواجهة عصابات مكسيكية متخصصة في الإتجار بالبشر واللي بتخطف بنت أخوه.
من المفهوم في فيلم من أفلام رامبو أن القصة مش بتكون هي أهم حاجه في الفيلم. لكن الأكشن هو المهم. والحقيقة أن مشاهد الأكشن في Rambo 5: Last Blood بتاخد منحنى مختلف ومتصاعد من بداية الفيلم لحد ما بتوصل لأعلى مستوى لها في الثلث الأخير تقريبا من الأحداث. حتى أننا نقدر نقول أن الفيلم بيقدم مستوى عالي جدا من الدموية والعنف بشكل نادرا ما شوفناه في معظم أفلام الأكشن لسنة ٢٠١٩. الأجمل أن أبطال الفيلم قالوا أن تتابعات الأكشن الأخيرة في الفيلم مقتبسة بدرجة كبيرة من سلسلة أفلام Home Alone ومش هانقدر نوضح أكتر من كده علشان مانحرقش أحداث الفيلم.
من الأمور المميزة في الفيلم الموسيقى التصويرية الجميلة واختيار الأغاني المتناسقة مع مشاهد الأكشن. كمان زوايا التصوير ومواقع التصوير جعلتنا نسافر لرحلة ممتعة على الصعيد البصري. كل دي حاجات لم يتم الاهتمام بها في الأفلام السابقة من السلسلة.
لو كنت من متابعي سلسلة أفلام رامبو Rambo 5: Last Blood هايكون خير ختام للسلسلة. ومش بعيد ماتقدرش تمسك دموعك خاصة مع مشاهد النهاية. أما لو كنت بتتفرج على السلسلة لأول مرة فاه تلاقي أنك بتشوف فيلم أكشن قوي ومميز. لكن طبعا ننصحك بمشاهدة السلسلة القديمة علشان تحس بمتعة مضاعفة.
