Ready or Not: قرايب العريس طيبين… بس عاوزين يقتلوا العروسة!
دايما بنكتشف حاجات كتير ما كناش نعرفها عن أهل العريس أو العروسة بعد الجواز. في فيلم Ready or Not جرايس – بتقوم بدورها سامارا ويفنج- أن أهل العريس عاوزين يقتلوها!
قصة Ready or Not معتمدة على فكرة العروسة اللي بتكتشف في بداية تعاملها مع اهل زوجها ان عندهم عادة غريبة. هل اصطياد وقتل الناس على سبيل الرياضة! الموضوع في الأول بيبان قدامها انه هزار لكنها بتكتشف انه حقيقة وبتقرر تصمد وتحاول تهرب وتحتفظ بحياته لحد اخر لحظة. ياترى هايحصل لها ايه؟!
على الرغم من أن الفكرة دموية ومخيفة، لكن مخرجين الفيلم مات بيتينيلي أولبين و تايلر جيليت قدروا يصيغوا ده في اطار من الكوميديا الممزوجة بالرعب. ووظفوا القصة توظيف جيد علشان يوصلوا للمشاهدين مزيج الرعب والكومديا بشكل يخليهم يضحكوا في عز مشهد مرعب او يخافوا في عز مشهد كوميدي! هو ده سر اعجاب قطاع كبير من المشاهدين بالأفلام المرعبة الكوميدية.
الأداء التمثيلي لـ سامارا ويفنج كان جيد. وقدرت تجسد شخصية البنت (المغفلة) اللي مش عارفه المستخبي لها. وأزاي شخصيتها بتتغير مع تغير الأحداث.
لكن لازم ننصح المشاهدين اللي ناويه تدخل الفيلم انها مش لازم تاخد الاحداث بجدية كبيرة وتركز في التفاصيل. لان الفيلم معتمد على المزج بين الكوميديا والاكشن بشكل يدي انطباع فانتازي عن الأحداث. بالتالي السيناريو مش لازم يكون متسق قوي على مدار الأحداث.
الديكورات والاضاءة ساعدت على اننا ندخل في جو الفيلم، والسيناريو نفسه كان متوازن لكن حسينا اننا كان المفترض نختصر مشاهد البداية شوية وندخل في الأحداث علطول خاصة أننا عارفين الخيوط العامة للقصة من التريلر
Ready or Not فيلم جيد لو هاتشوفه من الاطار الصحيح.. فيلم مرعب مع شوية كوميديا.. او فيلم كوميدي مع شوية رعب!
