Reprisal : لمحبي أفلام الأكشن بدون تعقيدات
على الرغم من أن كتير من الأفلام بيكون لها أبعاد سياسية أو إنسانية أو اجتماعية، إلا أن الهدف الأسمى – من وجهة نظرنا – في أي فيلم هي عنصر التسلية أو المتعة. وفي رأينا أن الفيلم مهما كان مهم ومؤثر، لو مش مسلي وقادر على شغل وقت فراغ المشاهدين، هانعتبره فيلم ضعيف وغير جيد.
صناع فيلم Reprisal كانوا عارفين النقطة دي كويس جدا ولعبوا عليها علشان يقدموا لنا فيلم يخطفنا من أول مشهد لأخر مشهد. حتى لو كانت قصته مكررة أو شوفناها في أعمال تانيه قبل كده.
Reprisal بيحكي عن مدير بنك بيستعين بجاره الضابط السابق، علشان يوقعوا مجرم متخصص في سرقة البنوك، وقادر على تنفيذ سرقاته باحترافية بحيث يدخل الشرطة في حلقات مفرغة من البحث عنه بلا جدوى. لكن مع تعقبهم له بتبدأ اللعبة تأخذ منحنى أكثر إثارة وخطورة. مش عاوزين نحرقه عليكم أكتر من كده.
على الرغم من أن القصة مكررة ومافيهاش أي مفاجأت أو أحداث غير متوقعة، إلا أن المخرج براين إي. ميلر قدر يقدم لنا سلسلة من الأحداث المتتابعة والقوية والمفهومة بشكل جيد من البداية للنهاية، بالتالي لم نحس بأي ضعف أو تكرار في القصة.
من الأمور المميزة كمان في الفيلم، السيناريو الواضح وسهل الفهم. والحقيقة أن برايس هامونز المؤلف قسم الفيلم لثلاث أقسام أساسية، وقدر يضع في نهاية كل فصل منهم اللي يخلينا مشدودين للمتابعة للنهاية بدون ملل.
على الرغم من تقدم بروس ويلز في السن (٦٣ سنة) إلا أنه قادر على تقديم دور قوي ومميز، والحقيقة أن ده من الأمور اللي تحسب له، وقدرته على التكيف مع أي دور يقوم به مش أمر جديد عليه. ويلز قام قبل كده ببطولة مجموعة من أفلام الأكشن لا يمكن ننساها زي سلسلة Red و The Expendables وغيرها من الأعمال.
فرانك جريلو في دور جاكوب كان من الأدوار المميزة واللي فيها كتير من المجهود والحركة، وفرانك من الفنانين اللي بدأ يتجه مؤخرا للمشاركة في أفلام حركة زي فيلم The Purge: Election Year واللي يعتبر من أفضل أفلام الحركة اللي شوفناها في الفترة الأخيرة.
خلاصة كلامنا عن Reprisal أنه ها يعجبكم جداً لو كنتم من محبي أفلام الحركة والمتعة والفهم السهل. أما لو بتحبوا الأفلام اللي فيها مفاجأت أو التواءات في السيناريو أو أهداف أبعد من المتعة والانسجام. مش هايكون الفيلم الأفضل بالنسبة لكم.
علشان تبقى عارف: صدر الفيلم في ٣١ أغسطس الماضي في الولايات المتحدة الأمريكية.
