Rings : أرجوك.. لا تشاهد هذا الفيديو!
على الرغم من أن فكرة الفيديو القصير الملعون اللى لما يشاهده أحد الأشخاص بتتحول حياته لجحيم ولازم يموت خلال إسبوع من مشاهدته. على الرغم من أن الفكرة دي أصبحت قديمة وتم تقديمها من قبل، إلا أنها لازالت فكرة قابلة للتقديم وجذب الجمهور، وقدرت تصنع نجاح سلسلة Rings على الرغم من تقديمها من قبل فى جزئين للسلسلة.
Rings من إخراج ف. خافيير غوتيريز ومن تأليف جاكوب أرون إيستس ومن بطولة ماتيلدا أنا انغريد لوتز و اليكس رو و جوني جاليكي.
الفيلم بيحكي عن روح شيطانية بتسكن فيلم فيديو وبتقتل كل شخص يشاهد الفيديو خلال إسبوع من تاريخ مشاهدته، إلا لو قام بنسخ الفيلم واستدراج شخص تاني لمشاهدته.
فى البداية بيبدأ الفيلم بمشاهد افتتاحية فى طائرة، لما بيحين موعد وفاة أحد الملعونين بمشاهدة الفيديو، ومع وفاته بتبدأ أحداث الجزء الجديد ومحاولة المعرضين للعنة بالفيديو إجبار أي شخص تاني على المشاهدة.
على الرغم من التطور التكنولوجي الكبير بين الأجزاء السابقة والجزء الحالي، لكن التطور ده لم ينعكس على المؤثرات الخاصة والخدع الخاصة بالفيلم، بل على العكس أنتجت فى النهاية خدع واضحة للعين أنها مصممة باستخدام الكمبيوتر والجرافيكس، وده كان شىء فى غير مصلحة الفيلم.
الأداء التمثيلي للأبطال كان متوسط الي جيد، وبشكل عام مش بننتظر كتير فيما يتعلق بالأداء التمثيلي فى أفلام الرعب، لأن كل المطلوب بيكون تأدية انفعالات الرعب والفزع، أو حتي الجنون وعدم السيطرة على النفس، وكلها انفعالات تمثيلية بسيطة ومش محتاجه مجهود تمثيلي كبير.
المميز فى الفيلم كان الديكورات اللى شكلت مع الخدع الجرافيكية ثنائي ممتاز، بالأضافة لزوايا التصوير وأختيار أماكن الكاميرا وتكنيكات الفزع فى الفيلم، وكلها أمور تحسب للقائمين على الفيلم.
Rings من نوعية الأفلام اللى ممكن مايكونش عندنا كلام كتير علشان نقوله عنها، لكنه فى النهاية فيلم رعب يحمل فكرة قادرة على إثارة الهلع رغم تكرارها فى باقي أجزاء السلسلة.
