Rock Dog : لسه الأغاني ممكنه!

بيعجبنا في الكثير من أفلام الأنيميشن، الرسالة اللي بيحملها الفيلم، واللي بتخاطب في أحيان كتير المشاهدين من فئات عمرية أكبر بكتير من اللي المفروض تكون بتتفرج على فيلم أنيميشن. وفيلم Rock Dog من الأفلام اللي بيتجلي فيها فكرة الرسالة اللي بتخاطب ناس أكبر سنا.

فريق العمل والقصة

Rock Dog من تأليف وإخراج آش برانون ومن بطولة مات ديلون و كينان تومبسون و إدي إيزارد و لويس بلاك.

الفيلم بيحكي عن مغامرة الكلب (بودي) اللي بيقوم بأداء صوت شخصيته الفنان لوك ويلسون، واللي بيقرر مغادرة المدينة اللي عاش فيها حياته كلها، علشان يدور على حقيقته ويشبع موهبته في عالم الموسيقى والغناء، وفى سبيل الوصول لهدفه بيحاول (بودي) يوصل بأي شكل لمغني الروك (أنجوس) اللي بيقوم بدوره (ايدي ايزارد)، واللي بيمتاز بالغرور وعدم الرغبة في التعاون مع أي شخص.

بتتقاطع خيوط القصة مع رغبة مجموعة من الذئاب السيطرة على قطيع الخراف اللي عايشه في المدينة الأصلية اللي بينحدر منها (بودي)، واللي بيلاقي نفسه بدون سلاح في مواجهة مجموعة من الأشرار.. هل ها تقدر الموسيقي والغناء ينقذوه المرة دي؟!

السيناريو والحوار

سيناريو الفيلم كان سلس ومفهوم، وكان دخول كل عنصر من عناصر الفيلم على موجة الأحداث محسوب هايكون امتي وها يعمل ايه بالضبط، لكن ده انعكس سلبا الى حد ما على السيناريو اللي كان ممكن أي شخص عنده بعض الخبرة بالأفلام يقدر يستنتج كل الأحداث اللي ها تحصل في الفيلم، والحقيقة الفيلم لم يحيد عن الخيط المرسوم له من البداية للنهاية، وماقدمش أي نوع من الإبهار على مستوي الأحداث والقصة.

الإخراج والمؤثرات

إخراج الفيلم كان متميز جدا، وقدر يوظف الأداء الصوتي للأبطال كل واحد فيهم في مكانه المناسب بالضبط، ولأن المخرج هو المؤلف، العمل في الحالة دي بيتميز بنوع من الترابط بين الأفكار وبين تنفيذها على الشاشة، وهو ده اللي لاحظناه من ترابط عناصر العمل كلها من بداية الفيلم لنهايته.

الموسيقي والحركة

المميز في الفيلم فعلا كان الموسيقي الرائعة، وخاصة التيمة الموسيقية اللي تطورت من أول مشهد تقريبا من مشاهد الفيلم، لحد ما وصلت لمستوي الإبهار في اللحظات الأخيرة من الفيلم. وكان من المميز جدا أننا كمشاهدين نعيش تطور التيمة الموسيقية للأحداث لحظة بلحظة، وده بيجعل المشاهد في حالة توحد واحترام للتيمة الموسيقية.

كمان حركة الكاميرا الخاصة بالأحداث كانت جيدة جدا، وتحريك الشخصيات وظهورها على الشاشة كان رائع، والألوان لعبت دور مهم علشان نشعر بالتفاؤل وندخل في المود العام مع الأحداث.

وأخيراً

لو عندك حلم وعاوز تحققه. سيب كل حاجه واسعي ورا حلمك. ممكن يكون نجاحك ونجاح كل اللي حواليك متوقفين على قرارك بالسعي وراء حلمك وعدم التخلي عنه!

علشان تبقى عارف: تقييم الفيلم على موقع IMDB 5.6 من 10 وشارك في التقييم حوالي 1000 مستخدم للموقع.