Rocketman : الحياة الخفية لسير ألتون جون
من أكتر الحاجات اللي بتعجبنا في أفلام السيرة الذاتية اللي بتنتجها هوليود، هي الصراحة الشديدة اللي بيتم تقديم الشخصيات بيها. على الرغم من أعمال السيرة الذاتية العربية اللي بتقدم الأشخاص أحياناً كأنهم ملايكة مش بيغلطوا!.
فيلم Rocketman بيتتبع الحياة الفنية والشخصية لسير ألتون جون، واحد من أعظم الموسيقيين مش أنجلترا والعالم. وازاي اكتشف موهبته وقدر يطورها. وايه اللي وصلته له موهبته من نجاحات وفشل وصله في بعض الأحيان لمحاولة الأنتحار!
تارون إيجرتون ممثل قدير قدر يلعب شخصية التون جو بشكل جيد جدا. وأعتمد في تجسيد الشخصية على تجسيد الروح بأكتر من تجسيد الشكل الخارجي. وساعده على تجسيد الشخصية بشكل صحيح الكتابة المُخلصة لـ(لي هول) مع إخراج قوي من ديكستر فليتش.
عجبنا كمان في الفيلم ابراز الحياة الشخصية لإلتون جون بكل ما فيها من تعقيدات ومشاكل وحياة – غير طبيعية – بتفرضها عليه حياة الشهرة والأضواء.
الموسيقى والأغاني لعبت دور جميل جدا مع الديكورات علشان تخلي كل مشهد حالة منفصلة بذاتها. وممكن المشاهدين يلاقوا نفسهم بيبكوا في بعض المشاهد ويضحكوا في مشاهد تانيه بشكل يخليهم ما يحسوش بزمن الفيلم رغم أنه طويل نسبياً – حوالي ساعتين –
فيلم Rocketman ممكن يكون مش مناسب للمشاهدين اللي مالهومش في عالم الموسيقى، أو الغير مهتمين بحياة ألتون جون بشكل كبير. لأن في الحالة دي الفيلم هايكون ممل ومافيهوش أحداث كتير.
