Salma’s Big Wish : نظرة مختلفة للتفكك الأسري

بنحب أفلام الانيميشن اللي بيكون لها اكتر من هدف، هدف بسيط على قدر عقول الأطفال اللي بتتفرج وهدف أكبر لو حد من فئة عمرية أكبر بيتفرج على الفيلم. هو ده اللي بيحاول فيلم Salma’s Big Wish يقدمه للمشاهدين.

Salma’s Big Wish بيحكي عن بنت صغيرة بتحاول وبتسعى طوال الوقت أنها تلاقي أي أثر لأهلها اللي بيقال لها أنهم تركوها وهي صغيرة. وعند مرحلة معينة بتيأس من البحث عنهم، لحد ما بتكتشف قدرة جديدة بتخليها تقدر تعمل حاجات مكانتش تحلم بيها. ايه هي؟ وهاتستخدمها ازاي؟ هو ده اللي بنعرفه من خلال احداث الفيلم.

Salma’s Big Wish بيسلط الضوء بشكل غير مباشر على مشاكل التفكك الأسري وازاي المفروض الأهل يكونوا مع أبنائهم بشكل مستمر علشان نفسيتهم تكون أفضل. وعجبتنا رسالة الفيلم اللي ممكن ماتكونش واضحه لكل المشاهدين لكن هاتوصل للي عاوز يدور على ما وراء كل مشاهد من المشاهد.

مستوى الرسوميات وتحريك الشخصيات على الشاشة كان ضعيف. وده ممكن يخلي الأطفال اللي بيتفرجوا على الفيلم يتضايقوا من نمط تحرك الشخصيات وظهورها على الشاشة. كمان مكانش فيه تنوع في الألوان أو تغيرات كبيرة فيها. وكانت الإضاءة المنخفضة مسيطرة على جزء طويل من الفيلم وده يعتبر من عيوبه.

أما الأداء الصوتي لـ كريستينا ميليسا و سوزانا بايستروس و دينو أندرادي وباقي أبطال الفيلم فكان جيد ومنسجم مع شكل الشخصيات على الشاشة بشكل يخلينا قادرين على المتابعة بدون ملل.

صعب نقول أن Salma’s Big Wish هو أفضل فيلم أنيميشن نشوفه في حياتنا. لكنه برضو فيلم جيد ويستحق المشاهدة خاصة من الفئات العمرية الأكبر شويه.