Scary Stories to Tell in the Dark : واجه مخاوف طفولتك علشان تنجو!

كلنا فاكرين لما كنا أطفال. كانت بعض القصص بتخلينا نشعر بالرعب. القصص اللي كنا بنحكيها في ليالي المصيف وتجمعات الصغار في التجمعات العائلية. يحصل ايه لو القصص دي تحولت لحقيقة وأصبحنا احنا أبطالها؟!

Scary Stories to Tell in the Dark بيحكي عن مجموعة من الأصدقاء بيكتشفوا كتاب فيه مجموعة من القصص المرعبة. لكن بدل ما تكون القصص دي مجرد قصص عابرة بيلاقوا نفسهم بيعيشوها وهي بتحصل بالفعل معاهم. ولازم يواجهوا مخاوف الطفولة علشان يقدروا يعيشوا.

تريلر الفيلم بيعطي ايحاء غلط أن الفيلم بيقدم جرعة رعب عالية ومستمرة من أول مشهد لأخر مشهد وده مش صح. الرعب الحقيقي في الفيلم بيبدأ بعد حوالي نصف ساعة من بداية الأحداث. وفي معظم الوقت بيكون رعب هادي مش قايم على المشاهد المفاجئة الا في بعض المشاهد.

كان ممكن يكون تقييمنا للفيلم أعلى لولا المؤثرات الخاصة والخدع السينمائية وتصميم الوحوش اللي كان أقل من المتوسط. وفي بعض المشاهد حسينا اننا عاوزين نضحك مش بس مش حاسين بالرعب!

لكن من عوامل قوة الفيلم الأداء التمثيلي لـ زوي مارجريت كوليتي و دين نوريس وباقي أبطال الفيلم. رغم صعوبة الحكم على الأداء التمثيلي من أفلام الرعب. كمان كتابة دان وكيفن هاجمان لسيناريو الفيلم كان قوي لولا ضعف التنفيذ من المخرج أندريه أفريدال.

Scary Stories to Tell in the Dark من الأفلام اللي تتشاف في الويك اند مع مشروب دافي منغير توقعات كبيرة على مستوى الرعب.