Searching : هل الأباء عارفين أولادهم كويس جداً؟!
في عالم بيعتمد على الكمبيوتر والأنترنت بشكل مستمر، بحيث أصبحت حياتنا بالكامل منسوخة على مجموعة من مواقع التواصل الأجتماعي والملفات المخزنة على السيرفرات العملاقة. فيلم Searching بيدق ناقوس الخطر لكل العائلات اللي عندها أبناء في سن المراهقة والشباب.
Searching بيحكي عن أب (بيقوم بدوره جون تشو) بيكتشف غياب بنته الوحيدة اللي بتقوم بدورها ميشيل لا. الأمر اللي بيدفعه لمحاولة استكشاف الكمبيوتر الشخصي الخاص بها بنفسه علشان يحاول يوصل لأي دليل على مكان اختفائها
طوال الوقت (جون) كان بيقول لنفسه أنه عارف بنته كويس وعارف هي بتعمل ايه وبتقابل مين كويس. ومع الوقت بيبدأ يكتشف أنه ثقته العمياء ومعرفته ببنته كانت في غير محلها، وإنه بالفعل مش عارف بنته كانت بتفكر في ايه وبتتصرف ازاي. ومن هنا بنقول أن الفيلم بيدق ناقوس الخطر للاهل علشان يهتموا أكتر بأبنائهم ويعطوهم من وقتهم ومجهودهم.
المميز في الفيلم أن المخرج والمؤلف آنيش شاجانتي التزم بتصوير الفيلم بالكامل تقريبا من خلال شاشة لابتوب (ماك) بتدور الأحداث من خلاله، سواء مكالمات التليفون أو عمليات البحث عبر الأنترنت أو حتى مشاهدة مقاطع مصورة على يوتيوب أو الجهاز اللي عليه الملفات. والحقيقة إن دي حاجه مش مبتكرة وشوفناها في أفلام تانيه زي Unfriended وغيرها لكن لا تزال من الحاجات الغير مستخدمة بكثرة كنمط تقديم أفلام.
Searching فيلم قدر يوظف ميزانيته القليلة من خلال الذكاء في التصوير والبراعة في المونتاج واستخدام جوانب قوة القصة علشان يقدم لنا صناع الفيلم في النهاية فيلم بيحترم ذكاء المشاهد وبيقدم له جرعة متوازنه من التشويق والأثارة.
نصيحة كايرو٣٦٠: جون تشو بطل الفيلم من مواليد كوريا الجنوبية وشارك قبل كده في أعمال زي Star Trek Beyond و In good company
