Second Act : متحاولش تبقى حد تاني غير نفسك!
لو حسيت أن الدنيا ضاقت بيك وأن مافيش طريق مختلف تقدر تاخده غير الطريق اللي انت فيه دلوقت – ومش مرتاح فيه – فيلم Second Act ممكن يقدم لكم قصة بتحكي عن ازاي تقدروا تعملوا إعادة تشكيل لحياتكم من جديد!
الفيلم بيحكي عن مايا أو جينفر لوبيز، واللي بتشتغل في أحد الشركات، وبتقابل كتير من المعوقات وحاسه أنها عايشة حياة مش حياتها. لكن عند مرحلة معينة بتقرر أنها تعيد بناء حياتها من جديد بالشكل اللي تحبه. هل هاتسمح لها الظروف بده؟
مخرج الفيلم هو بيتر سيجال وهو مخرج مشهور بإنتاج أعمال تصلح للمشاهدة الخفيفة أو المشاهدة بشكل أكثر عمقا – حسب سن ورغبة المشاهدين- وبنشوف في الفيلموجرافيا بتاعته أفلام زي Grudge Match و 50 First Dates و Naked Gun 33 وغيرها من الأعمال.
المميز في الفيلم زي ما قولنا أنه يصلح إما للمشاهدة كقصة عادية فيها كتير من المواقف الكوميدية أو ينفع كقصة ملهمة لكيفية عدم الاستسلام لليأس وتغيير نمط الحياة القادر على تغيير كل شيء تاني.
جينفر لوبيز واحدة من الممثلات اللي قدرت تثبت نفسها بقوة في عالم السينما. وهي من رائدات مدرسة السهل الممتنع في الأداء. والحقيقة أنها قدرت تقدم أداء كوميدي وجيد في نفس الوقت بدون ماتفقد تركيزها على باقي رسائل الفيلم. وبيشاركها البطولة ميلو فينتميلي و فانيسا هادجنز ليا ريميني.
من الجميل كمان في الفيلم اختيار أماكن التصوير وزوايا الكاميرا والديكورات. واللي عكست لنا اهتمام انتاجي بالتكلفة واهتمام إخراجي بالتفاصيل حتى التفاصيل الصغيرة. وكل التفاصيل دي بتصب في النهاية لمصلحة الفيلم واقبالنا عليه كمشاهدين.
Second Act مش أحسن فيلم كوميدي أو إنساني نشوفه. لكنه محاولة جيدة وتستحق التشجيع والمشاهدة. بنرشحه للمشاهدة لو عاوز تتحمس على خطوة جديدة تغير حياتك.
