Selena Gomez: My Mind & Me : الجانب المظلم لحياة تحت الأضواء
لما نتكلم عن حياة المشاهير، كل اللي بيخطر على بالنا، هي الفلوس بدون حساب، السفر لكل مكان بدون تعب، حفلات وسهر ودلع على أعلى مستوى. لكننا بننسى نشوف الجانب المظلم لحياة الشهرة، والضريبة اللي بيدفعها المشاهير من سلامهم النفسي، وصحتهم الجسدية والعقلية.
فيلم Selena Gomez: My Mind & Me بيستعرض الحياة الخفية على قطاع كبير من الناس، عن حياة المطربة والممثلة سلينا جوميز، وبيعرض حصريًا على شبكة Apple TV+ الشهيرة.
الفيلم بيغوص وراء سيلينا، وايه اللي بيحصل وراء كواليس حفلاتها وأعمالها، وازاي بتحس طوال الوقت أنها لوحدها غير كافية، وأن ثقتها بنفسها بتكون دائما مهتزه. وشعورها المستمر أن أدائها الفني مش كويس وأنها هاترجع تاني لفقاعة (ديزني) اللي بدأت معاهم رحلتها الفنية، واللي بتضع كل الفنانين اللي يشتغلوا معاها في قوالب ثابتة.
الفيلم بيستعرض الفترات الصعبة في حياة سيلينا، زي تشخيصها بمرض الذئبة، وخضوعها لعملية زراعة كلية، وبنشوف ازاي أنها لما بتحاول تتجاوز كل ألامها الجسدية بترجع من جديد لمسقط رأسها، علشان تتعرف من جديد على جيرانها بتوع زمان، وترجع تستعيد معاهم ذكرياتها عن حياتها لما كانت طفلة.
المميز في Selena Gomez: My Mind & Me أنه بيستعرض مجموعة كبيرة من الصور والفيديوهات لطفولة سيلينا، بالإضافة لصور ومقاطع من كواليس الحفلات. بنقرب فيها للوجه الحقيقي لسلينا بعيدا عن مكياج المحترفين وعدسات الكاميرات المحترفة في مداراة الألم والشعور باليأس والأحباط.
الجزء المهم في Selena Gomez: My Mind & Me هو اللي بيتم تشخيص سلينا فيه بالاضطراب ثنائي القطب. وبنشوف رحلتها في فهم نفسها بشكل أفضل، وفهم أن كل الاضطرابات اللي كانت بتعاني منها الفترة المصاحبة لانفصالها عن حبيبها المطرب (جاستن بيبر) كانت نتيجة مرض نفسي لازم تتعلم ازاي تتأقلم معاه.
أهم ما قدمه Selena Gomez: My Mind & Me على الإطلاق هو الجزء اللي بيناشد فيه صناع الفيلم أي شخص يشعر بالاكتئاب أو بالميول الانتحارية. أنه يتصل بالمتخصصين. ووضعت شركة أبل رابط لمجموعات متخصصة في الدعم والمساندة حول العالم، وبدون مقابل.
لو مش بتحبوا قصص كواليس حياة المشاهير، فيلم Selena Gomez: My Mind & Me مش هايكون أحسن فيلم تشوفوه. لكن لو مهتمين بتأثير حالتنا النفسية على شغلنا وحياتنا والطريقة اللي بنشوف بيها نفسنا والأخرين. ننصحكم بمشاهدة فيلم هايكون مميز بالنسبة لكم.
