Self/Less : البحث عن الخلود فى فيلم
مين فينا لم يفكر فى احد الايام فى فكرة الخلود؟ فكرة القدرة على قهر الموت والحياة الى الابد؟ على الرغم من استحالة الفكرة وتناولها فى اكثر من فيلم، الا ان self less قدر يقرب لنا الصورة بعض الشىء، وياخدنا فى رحلة فانتازية الى عالم الخلود.. لكن هل الخلود فعلاً فكرة كويسة زي ما كنا بنتصور؟ هو ده السؤال اللى بيحاول الفيلم يرد عليه طوال الوقت.
من اخراج تارسيم سينغ و تاليف اليكس وديفيد باستور بنشوف قصة ملياردير عجوز (بن كنجسلي) بيعاني من مرض السرطان وبيحتضر فى ايامه الاخيرة. الى ان يتلقى عرض من شركة او مؤسسة مجهولة بتدعوه فيها لفرصة جديدة للبقاء على قيد الحياة من خلال نقل روحه الى جسد اخر! طبعا كلنا عارفين انه هايقبل فى النهاية بعد فترة من التردد، ومن هنا بتبدأ الأحداث الحقيقية لما بيكتشف انه فى مقابل انتقاله لجسد اخر لازم يكون هناك متبرع بالجسد ده.. ومن هنا بيبدأ يراود بطلنا الجديد (ريان رينولدز) ذكريات عن حياته السابقة الامراللى بيقوده لاكتشافات مذهلة مش عاوزين نحرقها عليكم.
الاداء التمثيلي للابطال كان قوي ومتميز.. بن كنجسلي على الرغم من صغر مساحة دوره الا انه قدر يأديه بشكل قوي وعظيم، ريان رينولدز كمان ادي دور مهم فيما يتعلق بالاكشن واعطائنا الايحاء بالتحول من رجل عجوز لشاب صغير فى السن، لكن كان من المفترض ان يكون هناك رابط تمثيلي بين البطلين اللى بيأدوا نفس الشخصية، بحيث نشعر انهم نفس الشخص لكن فى جسدين مختلفين، لكن للاسف فات الاخراج –عن عمد او عن غير عمد- تقديم الرابط ده والاكتفاء باظهار الشخصيات كل على حده.
على الصعيد التمثيلي برضو دور مادلين او ناتالى مارتينز لم يكن بالقوة اللى كنا نتوقعها، ونعتقد ان وجودها فى الفيلم كان لمجرد توفير بطولة نسائية كعادة معظم الافلام، مع ان دورها كزوجة للبطل الشاب كان ممكن يخرج منه كتير من الانفعالات واللحظات التراجيدية، لكن اخلاص الفيلم فى النهاية كان للحركة والغموض والاثارة.
الموسيقي التصويرية لعبت دور مهم فى الاحداث خاصة بداية استكشاف (داميان) الشاب لجسده الجديد ولقدراته، وقدرت تلخص كتير من المشاهد وتقدم لنا كتير من الانفعالات بشكل متميز وراقي، لكن الديكورات لم تكن على نفس القدر من المسئولية على الرغم من المشاهد الافتتاحية اللى قدمت لنا فيها مشاهد قوية.
Self less مش افضل فيلم عن الخلود والانتقال من جسد لأخر.. لكنه فيلم يستحق المشاهدة بدون انطباعات اكتر من اللى قولنا عليها فى الريفيو.
