Serenity : الممثلين الصح في الفيلم الغلط!
حالة كبيرة من الترقب عند قطاع كبير من المشاهدين تزامن مع الإعلان عن بدء تصوير فيلم Serenity. والحقيقة أن القطاع الكبير من المشاهدين اللي ترقبت الفيلم كان عندهم حق. والأسباب كتير.. منها أن الفيلم بيشهد أول تعاون بين ماثيو ماكونهي و آن هاثاواي بعد فيلم Interstellar واللي كانت فيه الكيمياء بينهم من أعلى وأفضل ما يكون.
ومع طرح التريلر الخاص بالفيلم حسينا بترقب أكتر. الإعلان كان مميز وفيه مجموعة من المشاهد اللي بتوعد بفيلم على مستوى عالي جدا.. ومن هنا كانت الصدمة!
Serenity بيحكي عن قائد قارب صيد سمك، بيعود ماضيه لمطاردته بالتداخل مع مجموعة من القصص المتشابكة اللي بتنغص عليه حياته. لكن هل هايقدر يخرج من كل القصص دي؟ وهل هانقدر نفهم كل التشابكات اللي بتدور حوالين حياته؟
أول الصدمات اللي شوفناها في الفيلم هي قصة الفيلم. القصة عادية ومافيهاش التواءات Plot twist أو مفاجأت غير متوقعة. والحقيقة أننا كنا بنتوقع نشاهد قصة أكتر قوة من اللي شوفناها على الشاشة. خاصة لما تبقى الأسماء الكبيرة دي من النجوم مشاركه في الفيلم.
ثاني الصدمات هي أن إعلان الفيلم احتوى على كل المشاهد القوية تقريبا، ومش بنشوف أي مشاهد أفضل في الفيلم نفسه. وده كفيل بشعورنا بالإحباط وأننا مش بنشوف أي جديد في الفيلم نفسه.
لكن إحقاقا للحق. الفيلم لم يكن كله محبط. لا يمكن نغفل الأداء التمثيلي القوي والمميز من كل أبطال الفيلم وخاصة ماثيو ماكونهي و آن هاثاواي اللي بيثبتوا مع الوقت أن الكيمياء بينهم مش مجرد حالة وراحت لحالها. ونتمنى نشوف تعاون أكتر بينهم في المستقبل.
اختيار مشاهد التصوير وزوايا الكاميرا للمخرج والمؤلف ستيفن نايت كان من الأمور المميزة واللي جذبت ولفتت نظرنا للفيلم. لكننا طوال الوقت كان عندنا شعور أننا أمام الممثلين الصح في الفيلم الغلط. ولو كانت القصة أفضل وأكثر ترابطا كان ممكن الفيلم يكون من أفضل الأفلام اللي شوفناها مؤخرا.
بنرشح Serenity للمشاهدة للمشاهدين اللي ماعندهمش توقعات مسبقة بخصوص الفيلم، وعاوزين يستمتعوا بمستوى جيد من الأداء التمثيلي والتصوير وتصميم المشاهد.
