Seventh son : فكرة قوية وتنفيذ ضعيف

(الأبن السابع) أو Seventh Son هو الابن رقم 7 اللى بيتولد فى عيله الأب فيها هو ايضا الأخ السابع بين اخوته، هو ده (بن بارنس) او توم وارد، واللى بيبحث عنه السيد جريجوري (جيف بريدجس) واللى بيعمل كمطارد للأرواح الشريرة اللى بتحاول تسيطر على المدن الفقيرة واهلها الابرياء فى فترة عصور الظلام الأوروبية.

هى دى باختصار قصة Seventh son، الفيلم اللى الفه جوزيف ديلاني و ماكس بورينستيان، ومن اخراج سيرجي بودروف.

الفيلم بيبدأ بمشاهد افتتاحية للتعريف بالسيد جريجوري، وبيتم اظهاره بشكل اسطورى على الرغم من تقدمه فى السن، مع مشاهد لاخراج روح شريرة من جسد طفله صغيرة، ذكرتنا بالمشاهد المعتادة لاخراج الارواح الشريرة فى افلام الرعب زي The Exorcistوغيرها من الافلام اللى بتتناول الاطفال الممسوسة بارواح شريرة.

عرض الفيلم بتقنية 3D اضاف كتير للفيلم، ويمكن دي من المرات النادرة اللى نقول فيها كده، طوال الوقت بنشوف العرض ثلاثى الابعاد كل الهدف منه زيادة سعر التذكرة والسلام، لكن فى فيلم اليوم حسينا فى بعض المشاهد، خصوصا مشاهد الاشتباكات والحروب ان العرض بالـ3D اثري الفيلم واكسبه رونق خاص.

الاداء التمثيلي لكل الابطال تقريبا كان اقل من المتوقع بكثير، اداء مترهل وغريب على الاسماء الكبيرة اللى شاركت فى الفيلم، وتقييمنا للفيلم كان هايكون مختلف وأزيد من تقييمنا الحالى لو كان بس الممثلين بذلوا المجهود الكافى انهم يحسسونا انهم مش بيمثلوا! ودي كانت اكبر سقطة وقع فيها المخرج والممثلين على حد سواء.

الموسيقي التصويرية كانت قوية وحماسية، راقية ومتناسقه مع شريط الاحداث فى الفيلم، والتترات والمشاهد الافتتاحية تميزت فيها الموسيقي بخطوط قوية ومتناسقة مع الاحداث بشكل عام.

المؤثرات والخدع السينمائية كانت متميزه، مشاهد تحول الوحوش والمطاردة فى الماء والسقوط فى الشلالات كانت من اقوي المشاهد فى الفيلم، قد نكون شاهدنا مشاهد  اقوي فى افلام اخري، لكن نقدر نقول ان the seventh son قدم جرعة متوازنة من الابهار والاكشن وسقط فقط فى اختبار الاداء التمثيلي.

شوفوا the seventh son لو كنتم من محبى افلام الـ3D المتقنة، افلام الوحوش والارواح الشريرة، او الافلام اللى بتتكلم عن الاساطير.. اى شىء غير كده حاولوا تدوروا عليه فى فيلم اخر