Shakira In Concert: El Dorado World Tour : الحقيقة وراء حفلات شاكيرا
ممكن نحبها أو نكرهها. لكن لا يمكن ننكر أن شاكيرا تعتبر واحدة من أشهر وأقوى المطربات وراقصات الاستعراض في عصرنا الحالي. البنت الكولومبية اللي قدرت تشق طريقها من خلال رحلة كفاح طويلة علشان تتحول لأيقونة موسيقية عالمية بيتابعها الملايين. فيلم Shakira In Concert: El Dorado World Tour بياخدنا في جولة حقيقية بالكاميرا في كواليس واحدة من أشهر جولاتها الفنية.
Shakira In Concert: El Dorado World Tour بيتميز أنه مش مجرد فيلم موسيقي فيه مجموعة من الأغاني بتتعرض ورا بعضها وخلاص. هو بياخدنا برحلة مصورة خلف الكواليس لحياة شاكيرا أثناء واحدة من اشهر الجولات الفنية اللي قامت بيها في حياتها.
الفيلم مش بس بيصور شاكيرا على المسرح أو بين الجمهور. لكنه كمان بيصورها في الكواليس وأثناء الإعداد. وحتى في لحظات ضعفها وانكسارها. كل ده بسبب اهتمام المخرج والمؤلف جيمس ميريمان أنه يقدم عمل حقيقي وصادق وبيعبر عن الفنانة اللي بيصورها بجد بعيد عن زهوة الأضواء وبريق الشهرة.
الجميل في الفيلم كمان أنه بيقدم لنا مجموعة جميلة من أحلى أغاني شاكيرا في عصرها الذهبي. ومحبي الموسيقى اللي بتقدمها شاكيرا وأغانيها بشكل عام هايحسوا بالنوستالجيا مع كل اغنية بيتم تشغيلها أمامنا.
أما لو كنت مش مهتم بالموسيقى اللاتينية. أو كنت من اللي مش بيحبوا شاكيرا بشكل عام يبقى أكيد Shakira In Concert: El Dorado World Tour مش هايكون الفيلم المناسب لك.
