Shaun the Sheep Movie : مغامرة جديدة للخرفان المجنونة
صناع مسلسل (الخروف شون) قدروا يغيروا نظرة الاطفال –ونظرتنا- للخروف من مجرد حيوان عادي زي اى حيوان اخر، الى كائن جميل وذكي ومحبوب من الجميع.. بس مين قال ان فكرتنا عن الخروف اختلفت؟ من زمان –ونعتقد ان دي ايضا نفس فكرة باقى الاطفال- ونظرتنا للخروف على انه حيوان لا حول له ولا قوة. لكن هل ده اللى بيقوله الفيلم المستمد من المسلسل اللى بيحمل نفس الاسم؟
من تأليف واخراج مارك بيرتون بنشوف قصة الخروف شون، اللى بيقوم بالاداء الصوتي له جاستن فليتشر، وبيقوم بدور الاداء الصوتي للمزارع (جون سباركس).
الفيلم بيحكي عن … الحقيقة ان القصة مش مهمة بقدر ما المغامرة اللى بيواجهها الخروف شون هى الاهم.. المواقف الكوميدية وجرعة الضحك الكبيرة اللى بيحملها الفيلم كانت هى الاساس فى كل شىء، وبشكل عام صناع الفيلم كانوا عارفين بالظبط الجمهور اللى بيتوجهوا له بالفيلم.. الاطفال اللى حبوا الخروف شون وتعلقوا بالمواقف الكوميدية الصعبة اللى بيقع فيها دايماً ومغامراته اللى مش بتنتهي. علشان كده الفيلم كان بيستغل نجاح المسلسل الكارتونى مش اكتر.
من الصعب اننا نتكلم عن الموسيقي التصويرية فيما يتعلق بفيلم انيميشن. لان تركيز القائمين على الفيلم لم يكن منصبا عليها على الاطلاق. لكن اسلوب التحريك وجماليات الالوان هى اللى كانت ظاهرة فى البطولة قبل حتي اسماء الابطال. وعلى الرغم من اعتماد الفيلم على اسلوب التحريك المميز لسلسلة (الخروف شون) الا اننا شعرنا فى بعض المشاهد ببعض الخلل فى التحريك.
كان بودنا نتكلم اكتر من كده عن الفيلم. لكننا مش بنحب نتكلم ازيد –او اقل- من الازم عن اى فيلم. يكفى اننا نقول انه مناسب للاطفال وخصوصا متابعي السلسلة الاصلية. ويعتبر فيلم عائلي بنسبة 100% وتقدروا تطمنوا على اطفالكم معاه.
