Shaun the Sheep Movie: Farmageddon : فيلم ET بطريقة كارتونية

لما نتكلم عن Shaun the Sheep فا أحنا بنتكلم عن واحد من أشهر سلاسل الكارتون – الأنيميشن- حول العالم. حتى لما تحول المسلسل لفيلم كان فيلم قوي ومميز ونقصد هنا فيلم Shaun the Sheep Movie (2015). ولما كنا بنشوف الفيلم الثاني من نفس السلسلة كنا متوقعين مستويات عالية من الكوميديا مع حبكة مختلفة وقصة قوية… للأسف ده ماحصلش.

Shaun the Sheep Movie: Farmageddon بيحكي عن الخروف شون اللي بيدخل مغامرة جديدة علشان يرجع كائن فضائي لعالمه الأصلي خوفا من وصول منظمة شريرة له.

على الرغم من أن القصة ممكن يخرج منها حبكة قوية وكوميديا مميزة لكن حسينا في النهاية أننا بنتفرج على فيلم ET الشهير لكن في نسخة أنيميشن ضعيفة ومش مترابطة

يمكن شعورنا أو تقييمنا ده نابع من المرحلة العمرية اللي بنتفرج فيها على الفيلم. لكن نعتقد لو مشاهدين من الأطفال في سن من ٣ الى ٩ سنين مثلا ممكن يعجبهم الفيلم. خاصة مع غياب الحوار تماما عن الفيلم بشكل يخلي متابعته على الصغار أسهل وفهمهم له أسرع.

ومن العوامل الإيجابية في الفيلم الرسوميات ودقتها وطريقة تحريك الشخصيات على الشاشة بالطريقة المميزة لسلسلة Shaun the Sheep واللي بيحبها الكبار والصغار على حد سواء.

كمان صعوبة الأداء الصوتي هنا كانت في ضرورة الاعتماد على المؤثرات الصوتية بالمقام الأول مع تقديم رسوميات مميزة جدا علشان تشرح القصة بدون حوار تقريبا وهو الامر اللي نجح فيه الفيلم بدرجة كبيرة

Shaun the Sheep Movie: Farmageddon مش فيلم أنيميشن صالح للكبار والصغار، لكنه هايكون فيلم مميز للأطفال صغار السن خاصة أنه مش محتاج كتير من الشرح.